ڕاگەێندراوی بەڕێوبەرایەتی گشتی وەزارەتی بازرگانی لە سەر هاوردەکردنی ئۆتۆمبێل

پەیامی کورد    ...    بەڕێوبەری گشتی وەزارەتی بازرگانی حكوومەتی ھەرێمی كوردستان رایگەیاند، جێبەجێكردنی بڕیاری رێگریكردن لە ھاوردەكردنی ئۆتۆمبێلی لێدراو و ژێرئاوكەوتوو، ئەرێنییە و چیتر رێگە نادرێت ئۆتۆمبێلی خراپ ھاوردە بكرێن و لە ھەرێمی كوردستان ساخ بكرێنەوە.

عەبدولڕەزاق ناوەندی، بەڕێوبەری گشتی وەزارەتی بازرگانی حكوومەتی ھەرێمی كوردستان ڕایگەیاند : " بە هۆی بڕیاری رێگریكردن لە ھاوردەكردنی ئۆتۆمبێلی لێدراو و ژێرئاوكەوتوو، ژمارەی ئۆتۆمبێل لە بازاڕ كەم دەبێتەوە و ھاوردەكردنیش دیاریكراو دەبێت و ئۆتۆمبێل و فرۆشیاریش كەم دەبنەوە، بۆیە رەنگە ئەمە زیان بە كۆمەڵێك خەڵك بگەیەنێت كە ژیانیان لە ئاستێكی نزمدایە، بەڵام لە ڕووی كوالێتییەوە زۆر بڕیارێكی باشە و چیتر ئۆتۆمبێلی خراپ رێگەی پێ نادرێت ھاوردە بكرێت".

ناوەندی ڕوونیشی كردەوە: "ئەم بڕیارە، نابێتە ھۆی ئەوەی نرخی ئۆتۆمبێل لە ھەرێم بەرز ببێتەوە، چونكە هەرێمێك بێت دانیشتووانەكەی پێنج ملیۆن بێت و نزیكەی دوو ملیۆن ئۆتۆمبێلی تێدا بێت، كە ھەردوو كەس بە منداڵ و بەتەمەنەكانەوە و ئەوانەی لە بەندیخانەشدان، ئۆتۆمبێلێك زیاتریان بەردەكەوێت، مەحاڵە نرخی ئۆتۆمبێل بەرز ببێتەوە".

ئەمەش لە كاتێكدایە، بەردەوام لە ھەرێمی كوردستان گلەیی ئەوە دەكرا كە پێویستە سنوورێك بۆ ھاوردەكردنی ئۆتۆمبێل دابنرێت و ناكرێت سنوورەكان واڵا بن و بازرگانانیش بە ئارەزووی خۆیان ھەر جۆرە ئۆتۆمبێلێكیان بوێت، ھاوردەی بكەن و لە بازارەكانی ھەرێمی كوردستان ساخی بكەنەوە، ھەر بۆیە وەزارەتی دارایی بڕیاری دا چیتر رێگە نەدرێت ئۆتۆمبێلی لێدراو و ژێرئاوكەوتوو ھاوردەی ھەرێمی كوردستان بكرێت، ئەم بڕیارەش لە سەرەتای ئەم مانگەوە كەوتووەتە بواری جێبەجێكردنەوە.