نێچیرڤان بارزانی جه‌ختی له هاوکاری هاوبه‌ش له‌گه‌ڵ ئاڵمانیا کردەوە
پەیامی کورد ... نێچیرڤان بارزانی جه‌ختی له هاوکاری هاوبه‌ش له‌گه‌ڵ ئاڵمانیا کردەوە
له درێژه‌ی کارنامه‌که‌یدا له ڕۆژی سێیه‌می کۆنفرانسی ئاسایشی میوونشن، نیوه‌ڕۆی یەکشەممە 2025/2/16 نێچیرڤان بارزانی، سەرۆکی هەرێمی کوردستان، لەگەڵ شاندێکی پەرلەمانی ئاڵمانیا و وەزارەتی هاوکاری ئابووری و گەشەپێدانی ئاڵمانیا کۆبووه‌وه کە پێکهاتبوو لە د. نیلس شمید، ووتەبێژی کاروباری دەرەوە و هەماهەنگکاری گرووپ لە لیژنەی کاروباری دەرەوە لە پارتی دیموکراتی کۆمەڵایەتی (SPD)، ئەندریاس شوارز، ئەندامی لیژنەی بەرگری، مێتن هاکڤێردی، ئەندامی لیژنەی بوودجە و نیلس ئانین، وەزیری دەوڵەت لە وەزارەتی هاوکاری ئابووری و گەشەپێدانی ئاڵمانیا.
لە کۆبوونەوەکەدا جه‌خت له گرینگی بره‌ودان به پەیوەندییەکانی ئاڵمانیا له‌گه‌ڵ عێراق و هەرێمی کوردستان کرایه‌وه، هەروەها ده‌رباره‌ی دۆخی عێراق و هه‌رێمی کوردستان و پێشهاته‌کانی ناوچه‌که، بیروڕایان گۆڕییه‌وه.
سەرۆک نێچیرڤان بارزانی جەختی لەسەر گرینگی بەهێزکردنی هاوکاری لەگەڵ ئاڵمانیا کردەوە، بەتایبەتی لە بواری پەرەپێدانی تواناکانی بەرگری هێزەکانی پێشمەرگە و پاراستنی ئارامی و سه‌قامگیری.
لاى خۆیانەوە، ئەندامانی شاندەکە وێڕای ستایشکردنی ڕۆڵی هەرێمی کوردستان لە ناوچەکه‌دا، داکۆکییان لە دۆستایەتی هەرێمی کوردستان و ئاڵمانیا کردەوە، هه‌روه‌ها پابەندی ئاڵمانیایان بۆ بەردەوامی پشتگیری عێراق و هەرێمی کوردستان ده‌ربڕی و ئاماژەیان بە گرینگی فراوانکردنی هاوبەشی لە بوارەکانی گەشەپێدان، ئاسایش و پێویستی بەردەوامی هەماهەنگی هاوبەش کرد بۆ ڕووبەڕووبوونەوەی ئاڵنگارییه ئەمنییه‌کان.
هه‌ڵبژاردنی په‌رله‌مانی کوردستان و هه‌وڵه‌کانی پێکهێنانی کابینه‌ی تازه‌ی حکوومه‌تی هه‌رێمی کوردستان، دۆخی ئاوارە و پەنابەران و پێکهاته‌کان لە هەرێمی کوردستان و گۆڕانکارییه‌کانی سووریا، تەوەرێکی دیکەی کۆبوونەوەکە بوو.
ئەم بابەتە 31 جار خوێندراوەتەوە
