وەزیری ناوخۆی هەرێم و ڕاوێژکاری ئاسایشی نەتەوەیی عێراق هەماهەنگییە ئەمنییەکانیان تاوتوێ کرد

PeyamaKurd - وەزیری ناوخۆی هەرێم و ڕاوێژکاری ئاسایشی نەتەوەیی عێراق هەماهەنگییە ئەمنییەکانیان تاوتوێ کرد

دووشەممە ٦ی تەمووزی ٢٠٢٦، شاندێکی باڵای ئەمنی ھەرێمی کوردستان بە سەرۆکایەتی ڕێبەر ئەحمەد، وەزیری ناوخۆ، لە شاری بەغداد لەگەڵ قاسم ئەلعەبوودی، ڕاوێژکاری ئاسایشی نەتەوەیی عێراق کۆبووەوە.

مەبەستی سەرەکی دیدارەکە تاوتوێ کردنی دۆخی گشتی ئاسایشی ووڵات و بەھێزکردنی ھەماھەنگییەکانی نێوان ھەردوو حکوومەتی فیدراڵ و حکوومەتی ھەرێمی کوردستان بوو.

لە کۆبوونەوەکەدا، ھەردوولا تیشکیان خستە سەر کۆمەڵێک دۆسیەی ئەمنی ھاوبەش و جەختیان لە گرینگی بەردەوامی ھاوکارییەکان کردەوە بۆ پاراستنی سەقامگیری. یەکێک لە تەوەرە سەرەکییەکانی گفتوگۆکە بریتی بوو لە تاوتوێ کردنی میکانیزمەکانی جێ بەجێ کردنی ڕێککەوتننامەی ئەمنی ھاوبەشی نێوان عێراق و کۆماری ئیسلامی ئێران.

ھەردوو لایەن دووپاتیان لە پابەندبوونی تەواوی خۆیان بە بڕگەکانی ئەو ڕێککەوتننامەیە کردەوە، بە تایبەت لە پرسی پاراستنی سنوورە ھاوبەشەکان و ڕێگریکردن لە ھەر جۆرە پێشێلکارییەک کە مەترسی بۆ سەر ئاسایشی ناوچەکە درووست بکات. ئەم دیدارە وەک ھەوڵێکی ھەردوو حکوومەت دەبیندرێت بۆ یەک خستنی پلانە ئەمنییەکان و دڵنیابوونەوە لە پاراستنی سەروەری خاکی عێراق لە ساڵی ٢٠٢٦دا.