"ئەنجومەنی نیشتمانیی کورد": ئەوەی لە کەناراوەکانی سووریا ڕوویدا ئاماژەیە بۆ پشتگوێخستنی داواکارییەکانی گەل و بەردەوامبوون لە سیاسەتی پەراوێزخستن

پەیامی کورد- قامیشلۆ... "ئەنجومەنی نیشتمانیی کورد": ئەوەی لە کەناراوەکانی سووریا ڕوویدا ئاماژەیە بۆ پشتگوێخستنی داواکارییەکانی گەل و بەردەوامبوون لە سیاسەتی پەراوێزخستن

ئەنجومەنی نیشتمانیی کورد (ENKS) دوێنێ دووشەممە ڕایگەیاند، "ئەوەی ناوچەکانی کەناراوەکانی سووریا بەخۆیانەوە بینی و ئەو ڕووداوە ئازەربەخشە پێشووانەی لە سوەیدا ڕوویاندا، بە ڕوونی ئاماژەن بۆ ئەوەی پشتگوێخستنی داواکارییەکانی گەل و بەردەوامبوون لە سیاسەتی پەراوێزخستن و دوورخستنەوە نابێتە هۆی بەدیهێنانی سەقامگیریی خوازراو، بەڵکو دەبێتە هۆی پەرەسەندنی گرژییەکان."

ئەنجومەنەکە لە بەیاننامەیەکدا نیگەرانی خۆی دەربڕی سەبارەت بە پێشهاتەکانی ئەم دواییەی شاری حەلەب، بەتایبەتی پێشێلکردنی لێکتێگەیشتنەکان لە گەڕەکەکانی شێخ مەقسوود و ئەشرەفییە و بەردەوامبوونی گەمارۆدانیان، چونکە ئەمە کاریگەری نەرێنی لەسەر کۆی دۆخی سووریا دەبێت.

ئاماژەی بەوەش کرد کە سووریا دوای ساڵێک لە ڕووخانی ڕژێمی بەعس بە قۆناغێکی هەستیار و ورددا تێدەپەڕێت، کە تیایدا پێکهاتە جیاوازەکانی گەلی سووریا چاوەڕوانی ئاسۆیەکی نوێن لەسەر ئاستی سیاسی، ئابووری و ئەمنی، بەجۆرێک کە وەڵامدەرەوەی داواکارییە ڕەواکانیان بێت بۆ بنیاتنانی دەوڵەتێکی دیموکراسی فرەیی، لەسەر بنەمای دادپەروەری، هاوڵاتیبوونی یەکسان و سەروەری یاسا.

ڕوونیکردەوە ئەو جوڵانەوە جەماوەرییەی لەم دواییانەدا لە ناوچە کەناراوەکان ڕوویدا، جوڵانەوەیەکی ئاشتییانە بوو کە تیایدا هاوڵاتیان داواکارییەکانیان بۆ دامەزراندنی دەوڵەتێکی فیدراڵی، زامنکردنی مافی هەموو پێکهاتەکانی سووریا، گەڕاندنەوەی ئەو فەرمانبەرانەی بە شێوەیەکی سەرەڕۆیانە لە کارەکانیان دوورخرابوونەوە و باشترکردنی بژێوی ژیان دەربڕی.

هەروەها وتیشی: "پێویست بوو لایەنە ئەمنییەکان بە گیانی دیالۆگ و بەرپرسیارێتی نیشتمانییەوە مامەڵە لەگەڵ ئەم داواکارییانە بکەن و بە شێوەیەکی ئاشتییانە وەڵامیان بدەنەوە کە متمانە لە نێوان هاوڵاتیان و دەسەڵاتداراندا بەهێز بکات، نەک پەنا بۆ توندوتیژی و زیاترکردنی گرژییەکان و ئاڵۆزکردنی دۆخەکە ببەن."

ئەنجومەنی نیشتمانیی کورد جەختی لە گرنگی پاراستنی ئاشتیی کۆمەڵایەتی کردەوە و توندوتیژی لە هەر لایەنێکەوە بێت سەرکۆنە کرد، هەروەها هەموو هەوڵێکی ڕەتکردەوە کە ببێتە هۆی پاڵنانی شەقامی سووری بەرەو پێکدادانی ناوخۆیی، یان بەکارهێنانی جوڵانەوە ئاشتییانەکان بۆ شێواندنی ئامانجە ڕەواکانیان.

جەختیشی کردەوە کە نابێت هیچ کارێکی ئیستفزازی یان تێکدەرانە بکرێتە بیانوو بۆ سنووردارکردنی ئازادییە گشتییەکان یان گوشار خستنە سەر ئازادی ڕادەربڕین.

ئەنجومەنەکە داخی خۆی دەربڕی بەرامبەر بە بەردەوامی چەقبەستوویی لە کردنەوەی ڕێگە لەبەردەم شاندی هاوبەشی کورد بۆ دەسپێکردنی دیالۆگێکی جیدی و بەرپرسیارانە دەربارەی چارەسەری دیموکراسیانەی پرسی کورد لە سووریا، و جەختی کردەوە کە نابێت ئەم ڕێڕەوە سیاسییە لە لێکتێگەیشتنە ئەمنی و سەربازییەکان جیا بکرێتەوە، لەوانە ڕێککەوتنی ١٠ی ئازار کە لە نێوان هێزەکانی سووریای دیموکرات و دەسەڵاتی دیمەشقدا واژۆ کراوە.