وەزارەتی کۆچ و کۆچبەرانی تورکیا: زیاتر لە ٢ هەزار کۆچبەر ڕەوانەی وڵاتەکانیان کراونەتەوە

پەیامی کورد... وەزارەتی کۆچ و کۆچبەرانی تورکیا: زیاتر لە ٢ هەزار کۆچبەر ڕەوانەی وڵاتەکانیان کراونەتەوە

وەزارەتی کۆچ و کۆچبەرانی تورکیا بڵاوی کردەوە، تەنیا لە ماوەی شەش ڕۆژدا دوو هەزار و ٣٨٣ کۆچبەر ڕەوانەی وڵاتەکانیان کراونەتەوە و ئەمساڵیش نزیکەی ٢٠٠ هەزار کۆچبەری نایاسایی هەوڵی چوونە ناو ئەو وڵاتەیان داوە.

لە ڕاگەیەنراوێکدا وەزارەتی کۆچ و کۆچبەرانی تورکیا بڵاوی کردەوە، ڕێگری کراوە لە چوونە ناوەوەی چوار هەزار و ٢٧ کۆچبەری نایاسایی بۆ ناو خاکی وڵاتەکەیان.

ئەوەشی خستووەتەڕوو، تەنیا لە ماوەی شەش ڕۆژیشدا دوو هەزار و ٢٨٣ کۆچبەری نایاساییان بۆ وڵاتەکانیان ناردووەتەوە، کە هەزار و ٢٨٢ کۆچبەریان بە ڕەگەز ئەفغانی بوون و ٢٤٤ ی تریان هاووڵاتی پاکستانی بوون.

بەپێی ئامارەکانی وەزارەتی کۆچ و کۆچبەرانی تورکیا، تەنیا ئەمساڵ زیاتر لە ٢٠٠ هەزار کۆچبەر هەوڵی چوونە ناو تورکیایان داوە بە شێوەیەکی نایاسایی، وە ئێستا لە هەوڵدان بۆ گەڕاندنەوەی ١٧ هەزار کۆچبەری تر بۆ وڵاتەکانیان.