بەپەلە ... سوپای پاسداران کوێستانەکانی پیرانشارییان تۆپباران کرد

هێزەکانی سوپای پاسداران ناوچە کوێستانییەکانی پیرانشاریان تۆپباران کرد.

بەپێی ڕاپۆرت و زانیارییەکان، هێزەکانی سوپای پاسداران ئەمڕؤ یەکشەممە " ١ی ژوئیەی ٢٠١٨ " چەندین جار کوێستانە سنوورییەکانی پیرانشار و هەرێمی کوردستانیان تۆپباران کردووە.

بە پێی ڕاپۆرت و هەواڵی هەواڵنێران لە پیرانشار ، ڕایانگەیاندوە : تۆپخانەکانی سوپا چەندین جار بەرزاییەکانی کوێستانی ”برایم شیلانە“ لەنێوان پیرانشار و حاجی ئومەرانیان تۆپباران کردووە.

بە ووتەی سەرچاوەیەکی ئاگادار، ئەم کوێستانە شوێنی هاتووچۆی کۆڵبەرانی ئەو ناوچەیە یە.

لەلایەکی دیکەوە سوپای پاسداران ئەمڕۆ هێزێکی زیاتری ڕەوانەی پیرانشار کردووە و شارەکەی بە تەواوەتی میلیتاریزە کردووە.

دوای تێکهەڵچوونی چەکدارانەی چەند ڕۆژ پێشی هێزی پێشمەرگەی کوردستان و هێزە چەکدارەکانی ئێران لە پیرانشار و شنۆ حکومەت هێزی زیاتری ڕەوانەی شارە سنوورییەکان بەتایبەت شنۆ، پیرانشار، سەردەشت، سەقز، بانە و مەریوان کردووە.