بە پێی ڕاگەێندراوی وەزارەتی ناوخۆ ١٣ هەزار و ٥٠٠ چەک لە ناو بردران

پەیامی کورد  ...  بە پێی هەواڵێکی وەزارەتی ناوخۆ ڕاگەێندرا : تاکوو ئێستا ١٣ھەزار و ٥٠٠ چەك لەناو براون

بەڕێوەبەری گشتی وەزارەتی ناوخۆی حكوومەتی ھەرێم ڕایگەیاند، ئەمڕۆ كاروانی سێیەمی ئەو چەكانە لەناو بران، كە بێ مووڵەت بوون و دەستیان بەسەردا گیرابوو، بەمەش تاکوو ئێستا ١٣ھەزار و ٥٠٠ چەك لەناو براون.

د. سامی جەلال، ڕایگەیاند : ھەڵمەتی دەستبەسەرداگرتن و لەناوبردنی چەكە بێ مووڵەتەكان بەردەوامە و ئەمڕۆ كاروانی سێیەمی ئەو چەكانە لەناو بران، كە بێمۆڵەتن و دەستیان بەسەردا گیراوە و ژمارەیان ٣ھەزار و ٥٠٠ چەك بوو، كە لە ماوەی ڕابردووشدا بە دوو كاروان ١٠ هەزاری دیكە لەناو بران.

جەلال هەروەها ووتیشی ، ئەو چەكانەی لەناو دەبرێن، ئەوانەن كە پۆلین كراون و بە كەڵك نایەن، بۆیە لەناو دەبرێن و ئەوانەی دیكەش بەسەر ھێزەكانی ناوخۆدا دابەش دەكرێن.

بەڕێوەبەری گشتی وەزارەتی ناوخۆ باسی لەوەش كرد، ھەڵمەتی دەستبەسەرداگرتنی چەكە بێ مووڵەتەكان بەردەوام دەبێت و شەش مانگ مووڵەت دراوەتە خەڵك تا ئەوانەی چەكیان ھەیە تۆماری بكەن، ئەگەرنا دواتر ئەوانەش دەستیان بەسەردا دەگیرێت.