کرێی خوێندن بە پێی بڕیاری ساڵانی ڕابردوو کەم دەکرێتەوە

پەیامی کورد    ...   کرێی خوێندن بە پێی بڕیاری ساڵانی ڕابردوو کەم دەکرێتەوە

بڕیارە ئەمساڵیش ھاوشێوەی ساڵی ڕابردوو نرخی کرێی خوێندن لە زانکۆ و پەیمانگاکانی حکوومەت کەم بکرێتەوە و بڕیاردەری لیژنەی پەروەردە و خوێندنی باڵاش لە پەرلەمانی کوردستان دەڵێت، پێویستە ڕەوشی ئابووری قوتابییان لەبەرچاو بگیرێت.

د. گەلاوێژ عوبێد، بڕیاردەری لیژنەی پەروەردە و خوێندنی باڵا,  ڕایگەیاند: "ساڵی ڕابردوو بەھۆی ڕەوشی ئابوورییەوە داوامان کردبوو داشکاندن لە کرێی خوێندنی زانکۆ و پەیمانگاکانی حکوومەتی ھەرێمی کوردستان بکرێت و بڕیارەکە جێبەجێ کرا کە نرخی کرێی خوێندن ٤٥% کەم کرایەوە، ئەوەش ھاوکارئیەکی باش بوو بۆ قوتابییان."

بڕیاردەری لیژنەی خوێندنی باڵا دەشڵێت: "ئەمساڵیش داوامان کردووە حکوومەتی ھەرێمی کوردستان کرێی خوێندن ٤٥% داشکاندانی بۆ بکات و ڕەوشی ئابووری قوتابیانی ھەرێمی کوردستان لەبەرچاو بگرێت، چوونکە پێویستە لە قۆناغی ئێستادا ڕەوشی ئابووریی ھاووڵاتییان لەبەرچاو بگیرێت."

بەپێی زانیارییەکان ئەمساڵیش حکوومەت ھاوشێوەی ساڵی ڕابردوو ٤٥%ی نرخی خوێندنی ئێواران و پارالێل کەم دەکاتەوە و تەنیا ڕەزامەندی سەرۆکایەتی ئەنجوومەنی وەزیران ماوە بۆ جێبەجێکردنی بڕیارەکە.