لە ڕۆژهەڵاتی کوردستان دەستبەسەر ٥٧٠ پارچە شوێنەواری مێژووییدا گیرا

پەیامی کورد... لە ڕۆژهەڵاتی کوردستان دەستبەسەر ٥٧٠ پارچە شوێنەواری مێژووییدا گیرا

میدیاکانی ئێران بڵاویانکردەووە، لە ڕۆژهەڵاتی کوردستان دەستبەسەر ٥٧٠ پارچە شوێنەوار و لیرەی مێژووییدا گیراوە، کە ویستوویانە لە ژێر ناوی کەلوپەلی نێو ماڵ بیگوازنەوە بۆ تورکیا و لەوێشەوە بۆ کەنەدا.

ئەمڕۆ شەممە ١٩ی شوباتی ٢٠٢٢، بە پێی هەواڵێکی میدیاکانی ئێران، لە گومرگی بازرگانی شاری ماکۆ لە ڕۆژهەڵاتی کوردستان ٥٧٠ جۆر پارچە شوێنەوار و لیرەی مێژوویی دەستیان بەسەردا گیراوە، کە قاچاخچییانی شوێنەوار لە هەوڵدا بوون لە ژێر ناوی کەلوپەلی نێو ماڵ بیگوازنەوە بۆ تورکیا و لەوێشەوە بۆ کەنەدا.

ئاماژە بۆ ئەوەکراوە، ''ئەو پارچە شوێنەوارانە پێکهاتوون لە ١٨ پارچە کەلوپەلی برۆنزی و ٣٢٢ پارچە لیرەی مێژوویی زیوو.''

هاوکات، ''٨٧ پارچە لیرەی مسی تێدا بووە، لەگەڵ کتێب و کەلوپەلی مێژوویی نێوماڵ، کە مێژووی بەشێکیان بۆ سێ هەزار ساڵ لەمەوبەر دەگەڕێتەوە.''