بە بڕیاری دادگای باڵای تورکیا فەرمانی دەست بە سەر کردنی ٨٢ سەربازی سوپا سەر بە بەشی فڕۆکەوانی دەرکرا

دادگای باڵای تورکیا، بە تۆمەتی پەیوەندیان بە بزاڤی خزمەت فەرمانی دەستگیرکردنی بۆ ٨٢ سەربازی سوپای ووڵاتەکەی دەرکرد.

بەگوێرەی بەیاننامەیەکی نوسینگەی دادگاکە، ئەو ٨٢ سەربازە لە ئێستادا لە خزمەتی سەربازیدان و پەیوەندی تەلەفونی بەردەوامیان لەگەڵ ئەندام و لایەنگرە "هەڵهاتووەکان"ی بزاڤی خزمەتدا هەبووە.

 ئاماژە بەوەشدراوە، ئەو سەربازانە سەر بە کەرتی فرۆکەوانی سوپای تورکیان و لە کودەتا شکستخواردووەکەی ٢٠١٦ دا تێوەگلاون.

تا ئێستا  نزیکەی ٨٠ هەزار فەرمانبەر و ڕۆژنامەنوس و مامۆستا و سەرباز لە سەرانسەری شارەکانی تورکیادا بە تۆمەتی بەشداری لە کودەتاکەی ٢٠١٦ دا دەستگیرکراون، کە بەهۆیەوە ٢٥١ کەس کوژران و هەزارانی دیکەش برینداربوون.