حکوومەت جیددی یەتێكی تەواوی بۆ جێبەجێكردنی یاسای چاکسازی ھەیە و بە ھیچ شێوەیەك دەستكاری مووچەی فەرمانبەران ناكرێت

پەیامی کورد     ...    دەستپاکی هەرێمی کوردستان : حکوومەت جیددی یەتێكی تەواوی بۆ جێبەجێكردنی یاسای چاکسازی ھەیە و بە ھیچ شێوەیەك دەستكاری مووچەی فەرمانبەران ناكرێت .

سەرۆكی دەستەی دەستپاكی لە ھەرێمی كوردستان گوتی، حكوومەتی ھەرێمی كوردستان كاری باشی بۆ جێبەجێكردنی یاسای چاكسازی كردووە و زۆریش جیددییە لە جێبەجێكردنی. دەشڵێ: "مانگی داھاتوو دەست بە جێبەجێكردنی یاساكە دەكرێت و ئێمەش چەندین تیممان بۆ چاودێریكردن پێك ھێناوە".

حاكم ئەحمەد ئەنوەر، سەرۆكی دەستەی دەستپاكی لە ھەرێمی كوردستان رایگەیاند: "كاری ئێمە چاودێریكردنی كەرتی گشتییە و ھەر سەرپێچییەك ھەبێت لە ھەر بوارێكدا، جا لە پلە باڵاكان بێت یاخود خانەنشینی یان فەرمانبەران یانیش ھەر پرسێكی دیكە، ئەركی ئێمەیە بەدواداچوونی بۆ بكەین و لە یاسای چاكسازییشدا پێویستە رێكار وەربگیرێت دەرهەق بەو كەسانەی كە دەبنە لەمپەر لە بەردەم یاساكەدا كە جێبەجێ بكرێت، ئێمە چەندین تیممان دروست كردووە و لە رێگەی نووسراوێكەوە گشتاندن بەسەر ھەموو دام ودەزگا حكوومییەكانیش دەكەین، بۆ ئەوەی ھەر تیمێك لەوانە، چاودێری پرسێك لە چاكسازی بكات و ھاوكاری حكوومەت بێت، تیمیش ھەیە تایبەتە بە خانەنشینی و ھەیە تایبەتە بە پلەبەرزكردنەوە و ھەشە تایبەتە بە پلە باڵاكان".

ناوبراو گوتیشی: "بڕیارە لە مانگی داھاتوو لە ٧/٧ یاسای چاكسازی بكەوێتە بواری جێبەجێكردنەوە و، ئێمەش دەست بە چاودێریكردنی یاساكە دەكەین، كە حكوومەت جێبەجێی دەكات".

ئەنوەر ڕوونیشی كردەوە: "لەلایەن حكوومەتەوە جیددییەتێكی تەواو بۆ جێبەجێكردنی یاساكە ھەیە، چونكە زۆرینەی رێكارەكانی بڕیوە و لە پەرلەمان پەسەند كراوە و لە ئەنجوومەنی وەزیران بڕیاری لەسەر دراوە، بۆیە ئیرادەیەكی باش بۆ جێبەجێكردنی یاساكە ھەیە".

سەرۆكی دەستەی دەستپاكی ئەوەشی خستە ڕوو: "تا ئێستا ئەو ژمارانەی دەووترێن ھیچیان ڕاست نین و ھەمووی تەنھا قسەیە و حكوومەت وادەیەكی دیاریكراوی بۆ ھەموو وەزارەتەكان داناوە، بۆ ئەوەی ووردبینی لە ناوەكان بكەن، تا بزانن كێ نایاسایی و كێ یاساییە، بۆیە ھەر كاتێك تەواو بوو، ئەوكات دیار دەبێت".

دەشڵێ: "بە ھیچ شێوەیەك دەستكاری مووچەی فەرمانبەران ناكرێت و جگە لە مووچەی ئەوانەی نایاسایین، چونكە ئەو یاسایە دەردەكرێت خۆی بۆ ئەوەیە كە عەدالەت درووست ببێت، نەك مووچەی فەرمانبەران كەم بكرێتەوە".