هەر کەسێک سەرپێچی لەم بڕیارە بکات ٥٠ هەزار تاکوو ٥ میلیۆن دینار سزا دەدرێت

پەیامی کورد     ...   هەر کەسێک سەرپێچی لەم بڕیارە بکات ٥٠ هەزار تاکوو ٥ میلیۆن دینار سزا دەدرێت

بەڕێوبەری گشتی بازرگانی لە وەزارەتی بازرگانی دەڵێت، بۆ ئەوەی لە مانگی ڕەمەزاندا گرانفرۆشی نەكرێت، تیمەكانی چاودێریی بازاڕ و شوێنە گشتییەكان زیاد دەكەن، ئەوەشی  نرخ بەرز بكاتەوە، لە دەسەڵاتی وەزارەتە بە بڕی  ٥٠ هەزار تا ٥ ملیۆن دینار سزای بدات.

نەوزاد شێخ كامیل، بەڕێوبەری گشتی بازرگانی لە وەزارەتی بازرگانی رایگەیاند: "بە مەبەستی ڕێكخستنی نرخەكان و ڕێگریكردن لە گرانفرۆشی لە مانگی  پیرۆزی ڕەمەزاندا، تیمەكانی چاودێریی بازاڕ زیاد دەكەین و رۆژانەش بەپێی بەرنامەیەكی ئامادەكراو لە زۆربەی ماركێت، مۆڵەكان و ئەو شوێنە گشتیانەی كە هاووڵاتیان ڕووی تێدەكەن بە مەبەستی دابینكردنی شت و مەک و كاڵاكانیان، چاودێرییەكی ووردی بازاڕەكان دەكەن و ئەگەر دەركەوت هەر فرۆشیارێك نرخی بەرز كردبێتەوە یان كاڵای خراپ و بەسەرچوو بفرۆشێت، ڕووبەڕووی سزا دەبێتەوە، كە لە ٥٠ هەزارەوە دەست پێدەكات تا ٥ ملیۆن دینار".  

شێخ كامیل ووتیشی: "بەپێی سەرپێچییەكان، سزاكان دەگۆڕێن، سزاكانیش زیاتر ماددی و پێبژاردن و داخستنە، ئەگەر سەرپێچییەكەش زۆر گەورە بێت، ڕووبەڕوی دادگا دەكرێتەوە، كە چاوپۆشی لە هیچ كەس و لایەنێك ناكرێت، بۆیە پیویستە فرۆشیاران و بازرگانان پابەندی ڕێنماییە كارپێكراوەكان بن".

بەڕێوبەری گشتی بازرگانی ئاماژەی بەوەش دا: "چاودێریكرنی بازاڕەكان لە ڕێگەی زیادكرنی تیمە گەڕۆكەكانەوە دەبێت بۆ بازاڕ و ناوەندەكانی فرۆشتن، چوونكە ئێستا مانگی رەِمەزانە و لە هەر كاتێكی تر زیاتر هاووڵاتیان سەردانی بازاڕكان دەكەن، بۆیە رەِنگە كەسانێك هەبن دۆخەكە بقۆزنەوە و گرانفۆشی بكەن".

ڕوونیشی كردەوە: "ڕێگە نادرێت بە ناوی بەرزبوونەوەی نرخی دۆلارەوە، نرخەكان لەڕادەبەدەر بەرز بكرێنەوە، چوونكە بەپێی یاسا، بە تووندی ڕووبەڕووی ئەو كەسانە دەبینەوە كە پەنا بۆ كارێكی لەم شێوەیە دەبەن".