سێ کۆڵبەر لە سنوورەکانی ڕۆژهەڵاتی كوردستان لەلایەن هێزەکانی ئێران بریندار کران

دوو کۆڵبەر بە تەقەی ڕاستەوخۆی هێزەکانی کۆماری ئیسلامیی ئێران بریندار كران، کۆڵبەرێکی دیکەش لەلایەن ئەو هێزانەوە بە لێدان و کوتان بە سەختی بریندار کراوە.

بەپێی زانیارییەکان، کۆڵبەرێک بە ناوی (محەمەد) خەڵکی گوندی (سێوەر) سەر بە شاری (مەریوان)، بە تەقەی ڕاستەوخۆی هێزەکانی ئێران لە سنووری (نەوسوود) بریندار بووە و 15 فیشەکی ساچمەیی بەرکەوتووە.

هاوکات، کۆڵبەرێکی خەڵکی شاری کامیاران بە ناوی (کاوان ڕۆستەمی) تەمەن 24 ساڵە و خەڵکی شاری (کامێران)، لە کاتی کۆڵبەریدا لە سنووری (هەنگەژال)ی شاری بانە، لەلایەن هێزەکانی ئێرانەوە لێی دراوە و بە سەختی بریندار بووە.

هەروەها کۆڵبەرێک بە ناوی (نووری درەزیارەت) تەمەن 45 ساڵە و خەڵکی گوندی (درەزیارەت) سە ربە بەشی سەرشیوی شاری سەقزە، بە تەقەی ڕاستەوخۆی هێزەکانی ئێران لە سنووری هەنگەژالی شاری بانە بریندار بووە. (نووری درەزیارەت) فیشەکی ساچمە بەر هەر دوو دەستی کەوتووە و بەهۆی ڕۆیشتنی فیشەکەکان بۆ ناو جومگەکانی، دەبێ نەشتەرگەری بۆ بکرێت.