سەرۆک بارزانی شەڕی براکوژی بە حەرام ڕاگەیاندووە

پەیامی کورد     ...   سەرۆک بارزانی شەڕی براکوژی بە حەرام ڕاگەیاندووە

''شەڕی براکوژی حەرامە، نابێ کورد بە دەستی کورد بکوژرێ''، ئەمە قسەی سەرۆک و ڕیبەڕی کوردان، سەرۆک بارزانییە دەربارەی شەڕی کورد و کورد، بۆیە حزبە سیاسییەکان پەیامێکیان بۆ سەرۆک بارزانی هەیە و سوپاسی هەڵوێستە نەتەوەیی و نیشتمانییەکانی دەکەن و دەڵێن، سەرۆک بارزانی بەپێی تەجروبەی سیاسی و شۆڕشگیڕی، بەرژەوەندییە نەتەوەیییەکانی لە پێش هەموو شتێک داناوە.

لە کۆتا کۆبوونەوەیدا لەگەڵ فراکسیۆنی پارتی لە پەرلەمانی کوردستان سەرۆک بارزانی بە ئەندامەکانی فراکسیۆنەکەی ڕایگەیاندبوو، ''هیچ جارێک خوێنی کورد بە دەستی کورد ناڕژێت و شەڕی براکوژیم حەرام کردووە''. لەو بارەیەوە موستەفا ئۆزجەلیک، سیاسەتمەداری کورد و سەرۆکی گشتیی پارتی ئازادیی کوردستان دەڵێت: ''سەرۆک بارزانی لە ئەنجامی ئەزموونێکی گەورە و دەوڵەمەند و بە هزر و بیر و هۆشمەندییەکی گەورەی نەتەوەیییەوە گەیشتووە بەو قەناعەتەی کەوا شەڕی براکوژی و نێوخۆییی حەرام کردووە و، دەبێ هەموو لایەنێک ئەم هەڵوێستەی سەرۆک بارزانی بکاتە ڕێباز و پەیام و بناغە بۆ هەموو کوردستانییان.''

'' ئاشکرایە هەندێک لایەن ئەم پەیامەی سەرۆک بارزانییان بۆ خۆیان بە دەرفەت زانیوە و دەیانەوێت بۆ بەرژەوەندییەکانیان بەکاری بێنن، تەجروبەی گەلی کورد ئەوەی ئیسبات کردووە کە هەمیشە شەڕی کورد خزمەتی بە دوژمانی کورد کردووە، دەبێ هەموو لایەنێک بە ژیری و ئەقڵانی کار بکەن و دەبێ هیچ لایەنێک ئەو ئاگرە خۆش نەکات، بۆیە دەبێ هەموویان بەرپرسیاریەتیی ئەوەیان لە بەرچاو بێت کە ئەم هەوڵانە زیان بە دەستکەوتەکانی کورد لە باشوور و نزیکبوونەکانی لایەنەکانی کورد لە ڕۆژئاڤا و هەوڵە ئازادییخوازییەکانی باکوور و ڕۆژهەڵات دەگەیەنێت.'' ئۆزجەلیک بۆ ماڵپەڕی فەرمیی پارتی دیموکراتی کوردستان وای گوت.

لە لایەیکی ترەوە، ڕەشید ئاکیجی، سەرۆکی پارتی دیموکراتی کوردستان دیاری کرد: "پەیامی سەرۆک بارزانی پەیامێکی بەجێیە و هەموو لایەنێک دەزانێت سەرۆک بارزانی ڕیگە بەو کارە نادات و هەمووشیان ئاگادارن سەرۆک بارزانی ئەم کارەی حەرام کردووە، بەڵام دەبێ پەکەکە و هاوئاوازەکانی سەروەریی کوردستان قبووڵ بکەن".

ئەو بە ماڵپەڕی فەرمیی پارتی دیموکراتی کوردستان گوتی: ''دەبێ پەکەکە لەجیاتی شەڕفروشییەکانی، ڕیز لەو پارچەیەی کوردستان بگرێت کە بە خوێن ڕزگار بووە. بەڵام پەکەکە ڕێگا نادات و سنوور دەرباز دەکات و دەیەوێت شەڕ لە دژی کورد بکات، بەڵام هەڵوێستی سەرۆک بارزانی هەڵوێستێکی گەورەی کوردایەتییە بۆ ڕاوەستانی و حەرامکردنی شەڕ."

هاوکات، سینان چەفتیۆرک، سەرۆکی پارتی کۆمۆنیستی کوردستان لە باکووری کوردستان، ڕایگەیاند : ''دەبێ پەکەکە ڕێز لە دامەزراوەکانی حکوومەتی کوردستان بگرێت لەوانەش پەرلەمان و حکوومەت، بۆیە ئێمە داوامان لە پەکەکە کردووە و دەبێ کێشە بۆ کورد دروست نەکات و، ئاگری شەڕ خۆش نەکات.''

ووتیشی: ''ئەم شەڕە زیان بە هەوڵەکانی نزیکبوونەوەی ئەنەکەسە و پەیەنەکە دەگەیەنێت و لە شەنگالیش كێشە دەنێتەوە، بۆیە هەڵوێستی سەرۆک بارزانی هەڵوێستیكی گەورەیە و هەر ئەوە لە سەرۆک بارزانی چاوەڕوان دەکرا، چونکە سەرۆک بارزانی دەزانێت زیانی شەڕی براکوژی چەند گەورەن و زیان بە دۆزی کورد دەگەیەنێت."