پەیامی ناوەندی ھاوكاریی بە بۆنەی مەرگی شاعیری ئازادیخوازی كورد جەلالی مەلەكشا

پەیامی کورد ... پەیامی ناوەندی ھاوكاریی بە بۆنەی مەرگی شاعیری ئازادیخوازی كورد جەلالی مەلەكشا

ناوەندی هاوکاری حیزبەکانی ڕۆژهەڵاتی کوردستان کە ٤ حیزب لە خۆ دەگرێت، بە بۆنەی کۆچی دوایی جەلال مەلەکشا، شاعیری ئازادیخواز و نەتەوەیی کورد لە شاری سنە، ڕاگەیەندراوێکی بڵاو کردەوە.

دەقی ڕاگەیەندراوەکە بە شێوەی خوارەوەیە؛

بەداخەوە رۆژی ١٠ی خەزەڵوەر، جەلالی ملەكشا، شاعیری بەھەڵوێست و ئازادیخوازی كورد لە تەمەنی 69 ساڵی بەهۆی وەستانی دڵ لەشاری سنە ماڵئاوایی لە ژیان كرد.

كاك جەلالی مەلەكشا كە هەر لەسەردەمی پاشایەتی بەهۆی بیری ئازادیخوازی ماوەیەك لە زیندان كرابوو، لەسەردەمی راپەڕین‌و پاش هاتنەسەركاری كۆماری ئیسلامیش بە شیعری شۆڕشگێڕانە‌و حەماسی بۆ خۆڕاگری خەڵكی كوردستان بەرامبەر بە رژیمی كۆماری ئیسلامی ناو و ناوبانگی دەركرد‌و شیعرەكانی بۆ خەبات‌و بۆ پێشمەرگە وێردی زمانی خەڵك بوو. جەلالی مەلەكشا بەهۆی شارەزایی لە ئەدەبیاتی كورد‌و فارسی ئەندامی كانونی نوسەرانی ئێران بوو. ئەو كە تەواوی تەمەنی لە ژێر گوشارەكانی رژیم‌و لە دۆخێكی سەختدا تێپەڕكرد، بەڵام قەت ورەی بەرنەدا‌و بەهۆی ئازادیخوازی‌و نوسینەكانیەوە خۆشەویستی هەموو خەڵكی كوردستان بوو.

ناوەندی هاوكاری حیزبەكانی كوردستانی ئێران بەم بۆنەیەوە سەرەخۆشی گەرمی خۆی ئاراستەی خانەوادە‌و كەسوكاری كاك جەلالی مەلەكشا‌و كۆڕی ئەدیبان‌و شاعیرانی كورد‌و خەڵكی شاری سنەی قارەمان‌و سەرجەم كوردستان دەكات.

ناو و یادی جەلالی مەلەكشا بۆ هەتاهەتایە لە بیرو زەینی كۆمەڵانی خەڵك‌و بزوتنەوەی رەوای كوردستاندا بە زیندویی‌و درەوشاوەیی دەمێنێتەوە.

ناوەندی هاوكاریی حیزبەكانی كوردستانی ئێران

11ی خەزەڵوەری 1399