عێراق باڵیۆزی خۆی لە تورکیا کشاندەوە

پەیامی کورد... عێراق باڵیۆزی خۆی لە تورکیا کشاندەوە

وەزارەتی دەرەوەی عێراق گەڕاندنەوەی باڵیۆزی کاربەڕێکەری عێراقی لە ئەنقەرەوە بۆ بەغدا ڕاگەیاند، ئەوەش وەک کاردانەوەیەک لە بەرامبەر هێرش و بۆردوومانەکانی تورکیا

وتەبێژی وەزارەتی دەرەوە، ئەحمەد ئەلسەحەف، بە ئاژانسی هەواڵیی عێراقییەی (٢٣ی تەممووزی ٢٠٢٢) ڕاگەیاند: "وەزارەت بڕیاریدا بە گەڕاندنەوەی باڵیۆزی کاربەڕێکەری عێراق لە ئەنقەرە بۆ بەغدا"، جەختیشی لەوە کردەوە کە "وەزارەتەکە جەخت دەکاتەوە هیچ ڕێککەوتنێکی ئەمنی و سەربازی لەگەڵ تورکیادا نییە».

هەر ئەمڕۆ وەزارەتی دەرەوەی عێراق ڕایگەیاند، لە ئەنجوومەنی ئاسایشی نێودەوڵەتی سکاڵای لە تورکیا کرد و داوای دانیشتنێکی نائاسایی ئەنجوومەنەکەی کرد لەبارەی "دەستدرێژییەکانی تورکیا."

ڕۆژی چوارشەممە (٢٠ی تەممووزی ٢٠٢٢) سێ تۆپ ئاراستەی ناوچەیەکی گەشتیاریی سنووری زاخۆ کران و بە هۆییەوە بەپێی دوایین ئامارەکان، نۆ کەس گیانیان لەدەستداوە و ٢٦ کەسی دیکەش بریندار بوون کە برینی هەندێک لە بریندارەکان سەختە. ئەو کەسانەی بوونەتە قوربانی، سەرجەمیان گەشتیاری عەرەبن و لە پارێزگاکانی عێراقەوە چوونەتە زاخۆ.