ئەمساڵ حەوت میلیۆن کەس بە هۆی برسێتییەوە گیانیان لە دەست داوە

پەیامی کورد ... ئەمساڵ حەوت میلیۆن کەس بە هۆی برسێتییەوە گیانیان لە دەست داوە

بەڕێوەبەری رێکخراوی خۆراکی جیهانی رایگەیاند، ئەمساڵ حەوت ملیۆن کەس بەهۆی برسێتییەوە گیانیان لەدەستداوە و ئەوەش، لە کاتێکدایە کە لە هەموو جیهاندا یەک ملیۆن کەس بە ڤایرۆسی کۆرۆنا گیانیان لەدەستداوە.

دەیڤد پەیسلی بەڕێوەبەری جێبەجێکاری بەرنامەی خۆراکی جیهانی لە کۆنفرانسی ڕێکخراوی خۆراک و کشتوکاڵی سەر بە نەتەوەیەکگرتووەکان (فاو) رایگەیاند، "هێشتا دەبێت پارەیەکی زۆر کۆبکەینەوە بۆ ئەوەی خەڵکی لە برسێتی و مردن رزگار بکەین".

پەیسلی ئاماژەی بەوەشکرد، "پێویستە لە ماوەی شەش مانگی داهاتوودا شەش ملیار و ٨٠٠ ملیۆن دۆلار کۆبکەینەوە بۆ ئەوەی لە سەردەمی کۆرۆنادا خەڵکی لە برسێتی و مردن پێ رزگار بکرێت".

رێکخراوی خۆراکی جیهانی ڕۆژی هەینی خەڵاتی نۆبڵی ئاشتی پێبەخشرا، ئەمەش وەکو پێزانینی لیژنەی خەڵاتی  نۆبڵ بۆ ئەرک و ماندوبوونی ستافەکانی ئەو رێکخراوە لە سەرانسەری جیهاندا کە تاوەکو ئێستا ژیانی ملیۆنان کەسی برسی و هەژاریان لە مردن رزگارکردووە.