شەش هاووڵاتیی کورد لە شنۆ سزای بەندکرانیان بە سەردا سەپا

پەیامی کورد... شەش هاووڵاتیی کورد لە شنۆ سزای بەندکرانیان بە سەردا سەپا

شەش هاووڵاتیی خەڵکی شنۆ لە لە دۆسیەیەکی هاوبەشدا لەلایەن دەزگای دادوەری کۆماری ئیسلامیی ئێرانەوە سەرجەم سزای ٢٥ ساڵ و ٦ مانگ مانگ بەندکرانیان بەسەردا سەپێندرا.

بەگوێرەی ڕاپۆرتێکی ڕێکخراوی مافی مرۆڤی هەنگاو، شەش هاووڵاتیی خەڵکی شنۆ لەلایەن لقی یەکی دادگای شۆڕشی ئەم شارە بە سەرۆکایەتی دادوەر «ڕەزایی» بە تۆمەتی «هاوکاری و ئەندامەتی لە حیزبی دێموکراتی کوردستانی ئێران» سزای بەندکرانیان بەسەردا سەپێندرا و ڕۆژی یەکشەممە ٧ی خاکەلێوەی ٢٧٢٢ (٢٧ی مارسی ٢٠٢٢) ئەم سزایەیان پێ ڕاگەیەندراوە.

بە پێی ئەم سزایە ڕەحمان یووسفی، کەماڵ قۆیتاسی، محەممەد خالید حەمزە پوور و ئەبووبەکر میناپاک هەر کام بە ٥ ساڵ بەندکران، عەزیز قادرتاج کە مامۆستای قوتابخانەیە سزای ٣ ساڵ و سەلیم شەریفی سزای ٢ ساڵ و شەش مانگ بەندکرانیان بەسەردا سەپێندراوە.

ئەم شەش هاووڵاتییە زستانی ساڵی ٢٧٢٠ هاوکات لەگەڵ شەپۆلی دەستبەسەرکرانی هاووڵاتییانی کورد لە شارەکانی کوردستان دەستبەسەر و ئاخرین دانیشتنی دادگاکەیان لە مانگی ڕەشەمەی ساڵی ڕابردوو بەڕێوەچوو.