مستەفا هیجری سەرۆکی حیزبی دیموکراتی كوردستان داوایەک دژی ئەوانەی دەیانەوێت یەکگرتوویی کورد تێک بدەن ڕادەگەێنێت

پەیامی کورد   ...  مستەفا هیجری سەرۆکی حیزبی دیموکراتی كوردستان داوایەک دژی ئەوانەی دەیانەوێت یەکگرتوویی کورد تێک بدەن ڕادەگەێنێت

مستەفا هیجری، بەرپرسی ناوەندی جێبەجێکاری حیزبی دیموکراتی كوردستان ، رایگەیاند، بۆ ئەم قۆناغەی رۆژهەڵاتی کوردستان هیچ هەنگاوێک لە پاراستنی یەکگرتوویی ناوخۆیی خەڵك و لایەنە سیاسییەکان گرینگتر و بەبایەخ تر نییە، بۆیە دژی ئەوانەی دەیانەوێت یەکگرتوویی کورد تێک بدەن داوا دەکات یەکگرتوویی هەم لە ناوخۆی کوردستان و هەم لەگەڵ بەشەکانی دیکەی ئێرانیش برەوی زیاتر پێ بدرێت.

مستەفا هیجری لە پەیامێکدا ئەوەشی خستوەتەڕوو، لەئێستادا رۆژهەڵاتی کوردستان بە قۆناغێکی پڕ لە ئاستەنگیدا تێدەپەڕێت چوونکە لەلایەک هەوڵی بێدەنگ کردنی دەدرێت و لەلایەکی دیکەش خەڵک بۆ درووستکردنی داهاتوویەکی باشتر لە ململانێ‌دایە، بۆیە ئەوەی دەتوانێ لەم دۆخەدا ئارامی و سەرکەوتن لە دواڕۆژدا مسۆگەر بکات، شتێک نییە بێجگە لە یەکگرتوویی ، پێکگەیشتن و لەیەکگەیشتنی خەڵکی کوردستان و هێزە سیاسییەکانی.

ئاماژەی بەوەش کردووە، "ئەوەی تاکوو ئەمڕۆ لە پاش شەهیدبوونی ژیناوە بوەتە هۆکارێک کە کۆمەڵگە و نیشتمانەکەمان باڵای بەرزە، یەکگرتوویی کوردستانیان و هێزە خەباتکارەکانی بووە. بەڵام ئەم یەکگرتوویی یە بێ کۆسپ نەبوە و نەیارەکانمان هەوڵیانداوە ڕێز و هەیمەنەی ئەم یەکانگیرییەی کوردستان بخەنە ژێر پرسیار و لە هەوڵی ئەوەدا بوون کە سەنگەری کوردستان لەرزۆک بکەن و بێهیوایی ببەخشنە کوردستانیان."

بەرپرسی ناوەندی جێبەجێکاری حزبی دیموکراتی كوردستانی ئێران، دەڵێت، "ئێمە گومانمان نە لە بزاڤی رزگاریخوازیی کوردستان و نە لە قەوارەی جوگرافیای-سیاسی ڕۆژهەڵات و نە لە خاڵە بنچینییەکانی مافی کوردستانیان نییە؛ بۆیە پێویست ناکات خۆمان و کۆمەڵگاکەمان تووشی دڵەڕاوکێ بکەین، لەبەر ئەوە داوا لە هەمووان دەکەم و دەڵێم وەرن با هەموومان بەتایبەت ئەندامان و لایەنگرانی حیزب و لایەنە سیاسییەکان قەڵەم، زمان و کردەوەمان لە ئاست بەهێز کردنی ئەو یەکگرتوویی یە بخەینەگەڕ، یەکگرتوویی هەم لە ناوخۆی کوردستان و هەم یەکگرتوویی کوردستان لەگەڵ بەشەکانی دیکەی ئێران".