ئەنجوومەنی نۆژین بۆ پشتیوانیکردن لە مامۆستایانی کوردستان ڕاگەیەنراوێکی بڵاو کردەوە

پەیامی کورد... ئەنجوومەنی نۆژین بۆ پشتیوانیکردن لە مامۆستایانی کوردستان ڕاگەیەنراوێکی بڵاو کردەوە

ئەنجوومەنی فەرهەنگی- کۆمەڵایەتیی "نۆژین" لە سنە، بۆ پشتیوانیکردن لە ناڕەزایەتیی مامۆستایانی کوردستان، ڕاگەیەنراوێکی بaاو کردەوە.

دەقی ڕاگەیەندراوەکە بەم چەشنەیە:

نەتەوەی بیرمەند و خۆڕاگری کورد!

بنکەی پەروەردە وەکوو هەموو بنکە و دیاردەکانی مودێڕنیتە لە هەناوی خۆیدا هەڵگری دوو تایبەتمەندی و لایەنی جیاواز و دژبەرە. پەروەردە لە مودێڕنیتەدا، سەرەڕای ڕەخساندنی دەرفەتی جیاواز بۆ ئاوەزی جیهان و بە دامەزراوەیی کردنی لێکۆڵینەوە و بارهێنان بۆ هەنگاونان بەرەو ناسین و تێگەمەندکردنی مرۆڤ، جیهان و پەیوەندییەکانی، هاوکات هەر لە سەرەتاوە بە هاتنە ئارای ڕێسای (فورمووڵی) ی زانست-دەسەڵات، ئامرازێک بۆ چاودێریکردن و ڕکێف کردن بووە.

هەبوونی ئەم دووانە دژبەرە لە هەناوی پەروەردەدا پێویستیی خوێندنەوە و توێژینەوەی ئەم دیاردەیە لە پەیوەندی لەگەڵ دیاردەکانی تر بە تایبەت چوارچێوە و فۆرمی دەوڵەت و دەسەڵاتدارەتی بەرجەستە دەکاتەوە.

دەوڵەت و دەسەڵاتە توتالیتارەکان، بنکەی پەروەردە وەکوو کارگەی بەرهەمهێنانی شێوازی دڵخواز و ئایدیۆلۆژی‌بردەی مرۆڤەکان سەیر دەکەن کە تێیدا دەبێ کاڵایەکی هاوشێوەی یەکسان بە ناوی مرۆڤی دەستەمۆکراو بەرهەم بێت و بە دروستکردنی بازنەیەکی بەرتەسک لە خودییەکان و ڕووبەرێکی فراوان لە ئەویدی، ئەوتر دەکەن بە دوژمن و هۆکار و پاساوی هەموو چەشنە هەڕەشە و کەموکوڕییەکانیان.

بنکەی پەروەردە لە کوردستان لە هەر سێ بواری زمان، چوارچێوە و ناوەڕۆکدا و بە درێژایی مێژوو لەلایەن گوتاری زاڵەوە وەکوو ئامرازی ڕکێف کردن کەڵکی لێ گیراوە. پەرەنەسەندنی وشیاریی هزری- کردەیی مرۆڤی کورد، دابڕانی مێژوویی، تواندنەوەی فەرهەنگی، ئەتومیزەکرانی کۆمەڵگە، داڕووخانی ئابووری و بەڕێوەبەرایەتی و... لە ئاکام و دەرکەوتەکانی سیستەمی پەروەردەیین. بۆیە ڕەخنەکاریی هەمەلایەنەی زمان، چوارچێوە، ناوەڕۆک و کار کردەکانی ئەم بنکەیە پێویستییەکی حاشاهەڵنەگری گۆڕەپانی هزری-کردەیی هەنووکەی کوردستانە.

جووڵانەوەی مامۆستایان لە کوردستان دەرخەری ئەوەیە کە جێبەجێکاران و تێکۆشەرانی ئەم بنکەیە لە بوارە جۆراوجۆرەکانەوە گەیشتوونەتە ڕادەیەک لە تەنگژە و وشیاری کە فۆرمی پێشوویان پێ قبووڵ ناکرێت و بە لێکدانەوەی خەسارەکانی سیستەمی پەروەردەیی، هەنگاوی کردەیی و بەرینیان بۆ گۆڕانی ئامانج، دەور و کار کردەکانی ئەم بنکەیە هاویشتووە.

ئەنجوومەنی نۆژین سەرەڕای ڕەخنەکاریی ڕادیکاڵی سیستەمی پەروەردە و بارهێنان و بەرزنرخاندنی تێکۆشانی مامۆستایانی وشیار و بەزاڵەهاتوو، خوازیاری ئازادکردنی مامۆستایانی بەندکراوە و وەپاڵدانی هەر چەشنە تۆمەتێک بە ئانتی‌ئوکسیدانێکی ئایدۆلۆژیک دەبینێت کە مەبەستی ڕاگیرکردن و کۆنترۆڵکردنەوەی هێزی ڕاپەڕیوە.

ئەنجوومەنی نۆژین پشتیوانیی خۆی بۆ داواکارییە نەتەوەیی، پەروەردەیی و سێنفییەکانیان دەردەبڕێت و ڕایدەگەیەنێت کە پشتیوانیکردن لە مامۆستایان ئەرکی توێژە جیاجیاکانی کۆمەڵگەیە و وڵامدانەوەی داواکارییەکانیان و ئازادکردنی مامۆستایانی بەندکراو ئەرکی دەسەڵاتە.

ئەنجوومەنی فەرهەنگی - کۆمەڵایەتیی نۆژین