ڕوونکردنەوەی دادگای سلێمانی لە سەر دەست بەسەرکردنی شاسوار عەبدۆلواحێد

پەیامی کورد    ...    دادگای سلێمانی له‌سه‌ر فه‌رمانی ده‌ستگیركردنی شاسوار عه‌بدۆلواحید سه‌رۆكی جووڵانه‌وه‌ی نه‌وه‌ی نوێ رونكردنه‌وه‌ ده‌دات.
دادگای سلێمانی له‌ په‌یجی فه‌رمی خۆی له‌ فه‌یسبوك ڕوونكردنه‌وه‌یه‌ك بۆ ڕای گشتی بڵاوكردوه‌ته‌وه‌ و تێیدا هاتوه‌ "رۆژی 29-7-2019 جووڵانه‌وه‌ی نه‌وه‌ی نوێ له‌ راگه‌یندراوێكدا هێرشێكی ناڕه‌وای كردوه‌ته‌سه‌ر دادگا و ده‌سه‌ڵاتی دادوه‌ری و تۆمه‌تی بێبنه‌ما و ناڕاستی داوه‌ته‌ پاڵمان به‌مه‌به‌ستی چه‌واشه‌كردن و به‌لاڕێدابردنی رای گشتی، بۆ هه‌موو هاووڵاتیانی هه‌رێمی كوردستانی ڕوونده‌كه‌ینه‌وه‌ كه‌ دادگاكان به‌پێی یاسا به‌ركاره‌كان كارده‌كه‌ن و دوورن له‌ هه‌ر كارێكی سیاسی و ململانێی نێوان لایه‌نه‌ سیاسییه‌كان و  هه‌مووان له‌به‌رده‌م یاسادا یه‌كسانن".
دادگای سلێمانی ڕوونیكردوه‌ته‌وه‌، ئه‌و دۆسیه‌ی له‌به‌یاننامه‌كه‌دا ئاماژه‌ی پێكراوه‌، فه‌رمانێكی ده‌ستگیركردنه‌ بۆ شاسوار عه‌بدۆلواحید قادر خاوه‌نی كۆمپانیای چاڤی گه‌شتیاری بوه‌، وه‌ك هاووڵاتیه‌كی تۆمه‌تبار و به‌بێ ڕه‌چاوكردنی پله‌و پۆسته‌ سیاسیه‌كه‌ی ده‌ركراوه‌، كه‌ له‌لایه‌ن كۆمه‌ڵێك له‌ خاوه‌ن پشكه‌كانی چاڤیلانده‌وه‌ سكاڵای له‌سه‌ر كراوه‌ و تۆمه‌تی فێڵ و هه‌ڵخه‌ڵه‌تاندن (احتیال)ی دراوه‌ته‌پاڵ به‌پێی ماده‌ی  456 له‌یاسای سزادانی عیراقی و كه‌یسه‌كه‌ش له‌قۆناغی لێكۆڵینه‌وه‌دایه‌.