مەسروور بارزانی پێشوازی لە باڵیۆزی ژاپۆن لە عێراق کرد

پەیامی کورد  ...  مەسروور بارزانی، ڕاوێژكاری ئەنجوومەنی ئاسایشی هەرێمی كوردستان، ئەمرۆ چوارشەممە ٢٠-٢-٢٠١٩، پێشوازی لە نافومی هاشیمۆتۆ باڵیۆزی ژاپۆن لە عێراق كرد.

لە دیدارێكدا، كە كۆنسووڵی گشتیی ژاپۆن لە هەولێر ئامادە بوو، دواپێشهاتەكانی ناوچەكە و فراوانكردنی پەیوەندییەكان و دەرفەتی وەبەرهێنان لە هەرێمی كوردستان تاوتوێ كرا.

مەسروور بارزانی، سوپاسی گەل و حكوومەتی ژاپۆنی كرد بۆ ئەو هاوكاری و یارمەتییانەی لە ماوەی رابردوودا پێشكەشی هەرێمی كوردستانی كردووە .

لەلای خۆیەوە، باڵیۆزی ژاپۆن ھیوای سەركەوتنی بۆ مەسروور بارزانی خواست لە سەرۆكایەتیكردنی كابینەی داھاتووی حكوومەتی هەرێمی كوردستان، هاوكات ئامادەیی وڵاتەكەی دەربڕی لە پێشكەشكردنی هاوكارییەكان و بەشداربوون لە پەرەپێدانی ژێرخانی هەرێمی كوردستان لە بوارە جیاجیاكاندا.

لە بەشیكی دیكەی دیدارەكەدا، گفتوگۆ لەبارەی رۆڵی كۆمپانیاكانی ژاپۆن لە بواری ئاوەدانكردنەوە و پەرەپێدان كرا و جەخت كرایەوە كە هەرێمی كوردستان ژینگەیەكی لەبارە بۆ وەبەرهێنان لە بوارە جیاجیاكاندا.

هەوڵ و هەنگاوەكانی پێكهێنانی كابینەی نوێی حكوومەتی هەرێمی كوردستان و قووڵتركردنەوەی پەیوەندییەكانی نێوان هەرێمی كوردستان و ژاپۆن، بە شێوەیەك لە بەرژەوەندیی هەردوولادا بێت، تەوەرێكی دیكەی دیدارەكە بوو.