سەرۆکی فراکسیۆنی گۆڕان ... وەکوو گۆڕان پشتگیریی بابەتی سەرۆکایەتی هەرێم و پەرلەمانی کوردستان دەکەین

پەیامی کورد  ...   سەرۆكی فراكسیۆنی بزووتنەوەی گۆڕان دەڵێ، حزبەكەی پشتگیریی سەرجەم ئەو هەنگاوانە دەكات كە بۆ هەڵبژاردنی سەرۆكی هەرێم لە پەرلەمان دەنرێن. دەشڵێ، بەشدارینەكردنی هەندێك لایەن، بۆ ناكۆكی سیاسی و وەرگرتنی پۆستی زیاتر لە حكوومەت دەگەڕێتەوە.

ئەندامێكی لیژنەی یاسایی لە پەرلەمانی كوردستان ڕایگەیاند : ئەمڕۆ لیژنەی یاسایی پەرلەمانی كوردستان كۆ دەبێتەوە و تێیدا دەست بە ئامادەكردنی راپۆرتی ھەمواری یاسای سەرۆكایەتی ھەرێمی كوردستان دەكرێت و ھەوڵ دەدرێت لە ماوەی چەند رۆژێكی كەمدا راپۆرتەكە ئامادە بكرێت، بۆ ئەوەی پەلە بكرێت لە كاراكردنەوەی سەرۆكایەتی ھەرێمی كوردستان.

خەدیجە عومەر، ئەندامی لیژنەی یاسایی لە پەرلەمانی كوردستان، ڕایگەیاند: "دوای ئەوەی پەرلەمان خوێندنەوەی یەكەمی بۆ ھەمواری یاسای سەرۆكایەتی ھەرێمی كوردستان كرد، ڕەوانەی لیژنەی یاسایی دەكرێت بۆ ئەوەی ڕاپۆرتی خۆیانی لەسەر ئامادە بكەن و ئێمەش ئەمڕۆ دەست بە ئامادەكردنی راپۆرتی خۆمان دەكەین و كۆبوونەوەیەك بۆ ئەو مەبەستە ساز دەكەین، ھەر كاتێكیش تەواومان كرد، ئاراستەی سەرۆكایەتی پەرلەمانی دەكەین و ھەركاتێك دامانە ئەوان كۆبوونەوەی دیكەی پەرلەمان دەكرێت بۆ ئەوەی خوێندنەوەی دووەمی بۆ بكرێت و گفتوگۆی لەسەر بكرێت و لە خوێندنەوەی سێیەمدا دەنگدانی لەسەر دەكرێت و پەسەند دەكرێت".

خەدیجە عومەر گوتیشی، ھەوڵ دەدەن ھەر لەم ھەفتەیەدا راپۆرتی خۆیان ئامادە بكەن و ئاراستەی سەرۆكایەتی پەرلەمانی بكەن بۆ ئەوەی پەرلەمان كۆ ببێتەوە و خوێندنەوەی دووەمی بۆ بكرێت و دواتریش پەسەند بكرێت.

دەشڵێ، ھەمواری یاسای سەرۆكایەتی ھەرێمی كوردستان ھەندێك دواكەوتووە و ھەوڵ دەدرێت پەلە بكرێت بۆ ئەوەی سەرۆكایەتی ھەرێمی كوردستان كارا بكرێتەوە، چوونكە پرسەكە زۆر گرینگە و پێویستە چیتر دوا نەخرێت.

هەر سەبارەت بەو پرسە، عەلی حەمەساڵح، سەرۆكی فڕاكسیۆنی گۆڕان، ڕایگەیاند؛ گۆڕان پشیگیری سەرجەم هەنگاوەكانی كاراكردنەوەی دامەزراوەی سەرۆكایەتی هەرێم دەكات، هەڵبژاردنی سەرۆكی هەرێمیش لە پەرلەمان بە دەستكەوت و كارێكی گرینگ وەسف دەكات.

عەلی حەمەساڵح گوتیشی: "بەشدارینەكردنی لایەنەكان، بۆ ململانێی حزبی و وەرگرتنی پـۆستی زیاتر لە حكوومەت دەگەڕێتەوە، لە ڕابردوودا هەر چوار لایەنەكە پڕۆژەی هاوبەشیان هەبوو و كۆك بوون لەسەر ئەوەی سەرۆكی هەرێم لە پەرلەمان هەڵبژێردرێـت بە سەرجەم دەسەڵاتەكانییەوە، بەڵام ئێـستا دەیانەوێـت ئەم ڕاستییە لە هاووڵاتیان بشارنەوە، بێگومان ئەو پڕۆژەیەی كە ڕەهەندی نیشتیمانیی هەیە و فڕاكسیۆنی پارتی و فڕاكسیۆنی گۆڕان و لایەنەكانی تر داوای دەكەن، هەمواری یاسای سەرۆكایەتیی هەرێمە".

حەمەساڵح روونیشی كردەوە؛ بزووتنەوەی گۆڕان پشگیریی هەموو ئەو هەنگاوانە دەكات كە لە پەرلەمانەوە ئاڕاستە دەكرێن بۆ هەمواری یاسای سەرۆكایەتیی هەرێم.

دەشڵێ: "جەخت لە هەڵبژاردنی سەرۆكی هەرێم دەكەینەوە لە پەرلەمان و گۆڕانیش پشگیریی تەواوی ئەو رێككەوتنانە دەكات كە لەگەڵ پارتی هەیەتی و واژۆی كردوون".