سەرۆکی حکومەتی هەرێمی کوردستان پێشوازی لە کونسوڵی ئەمریکا لە هەولێر دەکات

پەیامی کورد    ...    سەرۆکی حکومەتی هەرێمی کوردستان پێشوازی لە کونسووڵی ئەمریکا لە هەولێر دەکات

ئەمڕۆ پێنجشەممە 2020/5/14 مەسروور بارزانی سەرۆکی حکومەتی هەرێمی کوردستان پێشوازی لە ستیڤن فەیگن کونسووڵی گشتی ئەمریکا لە هەولێر کرد.

لە دیدارەکەدا ،گفتوگۆ دەربارەی دۆخی هەرێمی کوردستان و عێراق کرا . کونسووڵی ئەمریکا ستایشی رێکارە سەرکەوتووەکانی حکومەتی هەرێمی کوردستانی کرد تایبەت بە خۆپارێزی لە ڤیرووسی کۆرۆنا. 

سەرۆکی حکومەتی هەرێمی کوردستان تیشکی خستە سەر دۆخی  سەختی دارایی ئێستای هەرێمی کوردستان و ئاماژەی بەوەدا کە حکومەتی هەرێم پلانی تایبەتی بۆ رووبەڕووبوونەوەی ئەم دۆخە پەسەند کردووە کە بریتییە لە کەمکردنەوەی خەرجییەکان و زیادکردنی داهاتەکان. 

لە بارەی پەیوەندی نێوان هەرێمی کوردستان و حکومەتی فیدراڵیش لە بەغدا، سەرۆکی حکومەت جەختی لەوە کردەوە کە گفتوگۆکان بەردەوامن بە ئاراستەی چارەسەرکردنی کێشەکان لە سەر بنەمای دەستوور بە شێوەیەک کە ئەرک و مافەکانی هەرلایەک دیار و پارێزراوبن.  

هەردوولا هاوڕابوون لە سەر بەهێزکردنی پەیوەندییەکان و پەرەپێدانی وەبەرهێنانی ئەمەریکی لە هەرێمی کوردستاندا. سەرۆکی حکومەت داوای کرد ئەمەریکا و کۆمەڵگەی نێودەوڵەتی پشتگیریی  هەرێمی کوردستان و عیراق بکەن لە تێپەڕاندنی قەیرانی دارایی.