سەرۆکی حکوومەتی هەرێمی کوردستان لەگەڵ سەرۆکوەزیرانی پێشووی بەریتانیا کۆبووەوە

پەیامی کورد  ...  سەرۆکی حکوومەتی هەرێمی کوردستان لەگەڵ سەرۆکوەزیرانی پێشووی بەریتانیا کۆبووەوە

ئەمڕۆ دووشەممە 11/20، مەسروور بارزانی، سەرۆکی حکوومەتی هەرێمی کوردستان لەگەڵ بۆریس جانسن، سەرۆکوەزیرانی پێشووی بەریتانیا کۆبووەوە.

لە کۆبوونەوەکەدا بیروڕا لەبارەی پێشهات و گۆڕانکارییەکانی بارودۆخی گشتی عێراق و ناوچەکە و پەرەپێدانی پەیوەندییەکانی هەرێمی کوردستان و بەریتانیا ئاڵوگۆڕ کرا.

سەرۆکوەزیرانی پێشووی بەریتانیا ، ئاماژەی بەوە دا کە هەرێمی کوردستان قوربانییەکی زۆری لە پێناو مافەکانی داوە و پێویستە کۆمەڵگەی نێودەوڵەتی پشتیوانی لە مافەکانی خەڵکی کوردستان بکات . ووتیشی هەرێمی کوردستان، هەمیشە شوێنێکی تایبەتی لای من هەیە و بەردەوام دەبم لە پشتیوانی کردنتان.

سەرۆکوەزیرانی پێشووی بەریتانیا هەروەها جەختی لە پێویستی هەبوونی گەشتی فڕۆکەوانی ڕاستەوخۆی نێوان هەولێر و لەندەن کرد.

سەرۆکی حکوومەت سوپاسی بەریتانیای کرد بۆ پشتیوانی بەردەوامی لە هەرێمی کوردستان و تیشکی خستە سەر گۆڕانکارییەکانی عێراق و ناوچەکە و جەختی لە گرینگی پاراستنی مافەکانی گەلی کوردستان و ڕێزگرتن لە قەوارەی دەستووری هەرێم کردەوە لە پێناو سەقامگیربوونی ئاشتی و ئاسایش لە عێراق و ناوچەکەدا.