سەرۆکایەتی هەرێمی کوردستان: هيچ پاساوێك بۆ ئه‌م هێرشانه‌ نييه‌

پەیامی کورد … سەرۆکایەتی هەرێمی کوردستان: هيچ پاساوێك بۆ ئه‌م هێرشانه‌ نييه‌

سەبارەت بە هێرشەکەی دوێنێ شەوی سەر فڕۆکەخانەی نێودەوڵەتیی هەولێر و بنکەیەکی سەربازیی تورکیا لە باشیک، سەرۆکایەتیی هەرێمی کوردستان راگەیەندراوێکی بڵاوکردەوە.

لە بەشێکی راگەیەندراوەکەدا هاتووە "چه‌ندباره‌بوونه‌وه‌ى ئه‌م هێرشانه‌ هه‌ڵوه‌سته‌يه‌كى جددى ده‌وێت و ده‌بێ هه‌رێمى كوردستان و حكوومه‌تى فيدراڵى عيراق به‌ پشتيوانيى هاوپه‌يمانيى نێوده‌وڵه‌تى، هه‌ماهه‌نگى و هاريكاريى نێوانيان بۆ به‌ره‌نگاربوونه‌وه‌ى ئه‌و گرووپ و تاقمانه‌ى له‌ پشت ئه‌م هێرشانه‌وه‌ن زياتر بكه‌ن و سنوورێكى يه‌كجارييان بۆ دابنرێت تا چيتر ئارامى و سه‌قامگيريى وڵات نه‌خه‌نه‌ مه‌ترسييه‌وه‌ و دۆخه‌كه‌ ئاڵۆزتر نه‌بێت".

ئەمەی خوارەوە دەقی راگەیەندراوەکەیە:-

زۆر به‌ توندى سه‌ركۆنه‌ى ئه‌و هێرشه‌ تيرۆرستيانه‌ ده‌كه‌ين كه‌ ئه‌مشه‌و كرانه‌ سه‌ر فڕۆكه‌خانه‌‌ى نێوده‌وڵه‌تيى هه‌ولێر و پێگه‌يه‌كى هێزەکانی‌ توركيا له‌ باشيك. هيچ پاساوێك بۆ ئه‌م هێرشانه‌ نييه‌ و له‌ زيان و تێكدانى سه‌قامگيرى و ئاڵۆزكردنى زياترى دۆخى عێراق، هيچى ديكه‌ى لێناكه‌وێته‌وه‌ به‌ ته‌واوى دژى به‌رژه‌وه‌ندييه‌كانى وڵاته‌.

چه‌ندباره‌بوونه‌وه‌ى ئه‌م هێرشانه‌ هه‌ڵوه‌سته‌يه‌كى جددى ده‌وێت و ده‌بێ هه‌رێمى كوردستان و حكوومه‌تى فيدراڵى عيراق به‌ پشتيوانيى هاوپه‌يمانيى نێوده‌وڵه‌تى، هه‌ماهه‌نگى و هاريكاريى نێوانيان بۆ به‌ره‌نگاربوونه‌وه‌ى ئه‌و گرووپ و تاقمانه‌ى له‌ پشت ئه‌م هێرشانه‌وه‌ن زياتر بكه‌ن و سنوورێكى يه‌كجارييان بۆ دابنرێت تا چيتر ئارامى و سه‌قامگيريى وڵات نه‌خه‌نه‌ مه‌ترسييه‌وه‌ و دۆخه‌كه‌ ئاڵۆزتر نه‌بێت.

سەرۆکایەتی هەرێمی کوردستان

14ی 4ی 2021