سەرۆک بارزانی پێشوازی لە باڵیۆزی ژاپۆن لە عێراق کرد

پەیامی کورد... سەرۆک بارزانی پێشوازی لە باڵیۆزی ژاپۆن لە عێراق کرد

سەرۆک بارزانی لە پیرمام پێشوازی لە باڵیۆزی ژاپۆن لە عێراق کرد و باڵیۆزی ژاپۆن ڕایگەیاند، سەقامگیری و ئارامی هەرێمی کوردستان بە لای وڵاتەکەیەوە بابەتێکی گرنگە و جێی بایەخە.

ئەمڕۆ یەکشەممە ٢١ی ئابی ٢٠٢٢، لە سەلاحەددین، سەرۆک مەسعود بارزانی، پێشوازیی لە سوزیکی کۆتارۆ، باڵیۆزی ژاپۆن لە عێراق کرد و لە دیدارەکەدا کە ئاراکاوا میکیهیرۆ، کونسوڵی گشتیی ژاپۆن لە هەولێر ئامادەی بوو، باڵیۆزی ژاپۆن وێڕای ئاماژەدان بە خەباتی گەلی کوردستان بۆ گەیشتن بە ئازادی، ستایشی ڕۆڵی جەنابی بارزانیی نەمر و سەرۆک بارزانی و پارتی دیموکراتی کوردستانی کرد بۆ هەوڵەکانیان لە مسۆگەرکردنی ماف و دەستکەوتی مێژوویی بۆ گەلی کوردستان".

هەر لەو دیدارەدا باڵیۆزی ژاپۆن لە عێراق ئەوەی دووپات کردەوە، "سەقامگیریی هەرێمی کوردستان، بەلای وڵاتەکەیەوە بابەتێکی گرنگە و جێگەی بایەخە، هەروەها کورتەیەکی لەبارەی هاوکاری و هەماهەنگییەکانی وڵاتەکەی لە هەرێمی کوردستان و ناوچە کوردستانییەکانی دەرەوەی ئیدارەی هەرێم و شوێنەکانی تری عێراق خستە ڕوو کە پەیوەست بوو بە بابەتی خزمەتگوزراییە گشتییەکان و دابینکردنی ئاو و کارەبا. سەرۆک بارزانییش سوپاسی باڵیۆزی ژاپۆنی کرد و هیوای خواست پەیوەندییەکانی نێوان هەردوولا گەشەی زیاتر بکەن".

بارودۆخی سیاسیی عێراق و هەڵبژاردنەکانی هەرێمی کوردستان تەوەرێکی تری ئەو دیدارە بوو و سەرۆک بارزانی جەختی لەوە کردەوە کە پارتی دیموکراتی کوردستان هەمیشە خوازیارە و ئامادەیە هەڵبژاردنەکانی کوردستان لە وادەی دیاریکراوی خۆیدا بەڕێوە بچێت.