پۆستەکانی پشکی کورد لە خوار وەزارەتەکانەوە

پەیامی کورد    ...    پۆستەکانی پشکی کورد لە خوار وەزارەتەکانەوە

جیگری سەرۆکی فراکسیۆنی پارتی دیموکراتی کوردستان لە ئەنجوومەنی نوێنەرانی عێراق دەڵێ، زۆر پۆست هەن لە بەڕێوبەرایەتییە گشتییەکان و دەستەکان، بەتایبەت كومیسیۆنى هەڵبژاردن و نەزاهە و پشکی سەربازی و دارایی و بازرگانى و تەندرووستى، دەبێ کورد پشکداری کارای تێیاندا هەبێت.

بەشار کیکی جیگری سەرۆکی فراکسیۆنی پارتی دیموکراتی کوردستان لە ئەنجوومەنی نوێنەرانی عێراق ڕایگەیاند : "جگە لە وەرگرتنی سێ وەزارەتەکەی کورد، زیاتر لە چوار هەزار بەڕێوبەری گشتی و ٣٠٠ وەکیلیش لە عێراقدا هەن، لەنێو ئەم پۆستانەشدا زیاتر لە ٢٠٠ پۆست ده بێ بۆ کورد بن، ئەم پۆستانە زۆر گرینگن بۆ کورد و دەبێ نوینەریان هەبێ، بەتایبەت ئەوانەی دەسەڵاتی فیدراڵییان هەیە، بۆ نموونە، دەبێ کورد نوینەری لە سۆمۆ و كشتوكاڵ هەبێت و جێگری دەستەی نەزاهەش پشکی کوردە، لە فەرمانگەی بوودجەی وەزارەتی دارایی و لە فەرمانگەی قەرز و مینحەکانیش دەبێ کورد نوێنەری هەبێ، بریكارى وەزارەتەكانى بازرگانى و تەندرووستى و سوپاسالاری عێراق بۆ کورد دەبێت. ئەمەش بەپێی دەستوور دەبێ پرەنسیپى هاوسەنگی لە نێوان پێکهاتەکاندا بپارێزرێت."

بەشار کیکی ئاماژەیشی دا: "بەهۆی ئەو پەیوەندییە ناجێگیرانەی نێوان هەرێم و حکوومەتی عێراق، لە حکوومەتی عەبادیدا کورد نەمابوو، بەڵام ئەو پۆستانە وەردەگرینەوە، چوونکە ئەم پۆستانە پەیوەندییان بە ژیانی خەڵکی هەرێمەوە هەیە و ناکرێ تەنیا بایەخ به پۆستى وەزیر بدەین.

ناوبراو گوتی: "ئەم مەلەفە لەم کابینەیە کارا دەکرێتەوە، دەبێ کورد پشكى خوى وەربگرێت. دواکەوتنی ئەم مەلەفە له ماوەى ڕابردوودا دوو هۆکاری سیاسی و یاسایی هەبوو، چوونکە دەبێ لە پەرلەمانیش دەنگی لەسەر بدرێت."