بۆ دابەش کردنی مووچەی پێشمەرگە ئەم کارە دەکەوێتە واری جێبەجێ کردنەوە

پەیامی کورد      ...   بۆ دابەش کردنی مووچەی پێشمەرگە ئەم کارە دەکەوێتە واری جێبەجێ کردنەوە

بەڕێوبەری گشتی ڕاگەیاندن و ھۆشیاری نیشتمانی وەزارەتی پێشمەرگەی حکوومەتی ھەرێمی کوردستان ووتی، وەزارەتی پێشمەرگە لە پرۆسەی چاکسازی بەردەوامە و خاڵێکی دیکەی چاکسازی کەوتە بواری جێبەجێکردنەوە، ئەویش بەئەلکترۆنیکردنی مووچەی پێشمەرگەیە و ھاوشێوەی مووچەخۆرانی دیکە بە چەک و لە بانک مووچە وەردەگرن و لە ھەنگاوی یەکەمیشدا لیوای یەکی پیادەی وەزارەتی پێشمەرگە مووچە لە بانک وەردەگرن .

عەمید عوسمان محەمەد، بەڕێوبەری گشتی ڕاگەیاندن و ھۆشیاری نیشتمانی وەزارەتی پێشمەرگەی حکوومەتی ھەرێمی کوردستان، ڕایگەیاند : ''پرۆسەی بەئەلکترۆنیکردنی مووچەی ھێزی پێشمەرگە کەوتە بواری جێبەجێکردنەوە و ئێستا لیوای یەکی ھێزی پێشمەرگە مووچەیان بە چەک لە بانک وەردەگرن و سەرجەمیان چەکیان بۆ دروست کراوە و لەمەودوا بە شێوەی چەک و ئەلکترۆنی مووچە وەردەگرن و ئەمەش وەکوو ھەنگاوی یەکەمە و لەمەودوا ھەموو لیواکان بەو شێوەیە مووچە وەردەگرن، ئەمەش بە قۆناغ دەکرێت.''

عەمید عوسمان محەمەد باسی لەوەش کرد: ''سوودی ئەو کارە ئەوەیە کە ھێنان و بردنی پارە بە دەست نابێت و بانکەکان دەبنە شوێنی مووچە و، وەزارەتی پێشمەرگە قۆناغێکی دیکە لە چاکسازی دەستی پێ کردووە و کاری زیاتریش دەکرێت و ئەرکی دیکەش لە چاکسازی بەجێ دەگەیەنێت و ئەمە خاڵێکی دیکەی چاکسازییە.''

ووتی: ''جگە لەوەش، بندیوار نامینێت و ژمارە حیساب و پەنجەمۆر ھەیە و ئەو کەسەی چەکی بۆ دەکرێت، داتا و زانیاریی تەواوی هەیە و ڕێگرییەکی باشە بۆ ئەوانەی کە بن دیوارن، بۆیە ئەمە ھەنگاوێکی باشی چاکسازی وەزارەتی پێشمەرگەیە.''