Dadgeha Federal a Iraqê desthilatên Serokwezîr sînordar kirin

PeyamaKurd – Dadgeha Federal a Bilind a Iraqê derbarê sînorên desthilata Serokwezîr de biryareke girîng da û ragihand ku Serokwezîr nikare rasterast lêpirsînê li karmendên sivîl bike an jî wan ceza bike. Ev biryara dadgehê piştî serlêdana Wezîrê Pîşesaziyê Xalid Battal hat dayîn û tê de hat destnîşankirin ku Serokwezîr di warê dîsîplîna karmendên ku rasterast ne girêdayî Serokatiya Wezîran in de, ne xwedî desthilateke serbixwe ye.

Li gorî şîroveya dadgehê, Serokwezîr wekî serokê desthilata cîbicîkar dikare çavdêriya karên saziyan bike, lê di rewşên îhmalkariyê de divê ne bi xwe, lê bi rêya wezîrên peywendîdar an serokên saziyan lêpirsînê bide destpêkirin. Dadgehê tekez kir ku divê Serokwezîr di sepandina cezayên dîsîplînê de cihê serokên yekîneyên îdarî negire û rêz li hiyerarşiya qanûnî ya saziyan were girtin.

Ev biryar li ser bingeha Qanûna Dîsîplînê ya Karmendên Sivîl hatiye girtin da ku mafê karmendan ê ji bo îtîrazkirina li dijî cezayan were parastin. Bi vê biryarê re, prosedura cezakirina karmendan vedigere ser wezaret û saziyên wan ên taybet, û Serokwezîr tenê dikare wekî çavdêrê bicîhanîna qanûnê tevbigere