Îranê Tengava Hurmuzê girt! Em ê li her keştiya ku hewl dide derbas bibe bidin!

PeyamaKurd - Piştî zêdebûna aloziyên leşkerî yên di navbera Îran û DYA û Îsraîlê de, rêveberiya Tehranê ragihand ku wan Tengava Hurmuzê, dilê bazirganiya enerjiyê ya cîhanî, ji bo keştîvaniyê girtiye.

Sûpaya Pasdarên Şoreşa Îranê (IRGC) diyar kir ku hemû keştîyên ku hewl didin ji rêya avê ya stratejîk derbas bibin wê bibin hedef.

Tûgay General Îbrahîm Cebarî, şêwirmendê fermandarê IRGC, di daxuyaniyekê de li ser televîzyona dewletê girtina fiîlî ya tengavê piştrast kir.

Cebarî got, "Bihayê petrolê gihîştiye 81 dolarî; cîhan hêvî dike ku ev hejmar bi kêmî ve bigihîje 200 dolarî. Tengava Hurmuzê girtî ye. Hêzên me yên deryayî û bejayî wê her keştîyek ku hewl dide ji vê tengavê derbas bibe bişewitînin."

Beravên petrolê hatine armanckirin

Tûgay General Cebarî diyar kir ku stratejiya Îranê wê ne tenê bi tengavê ve sînordar be, lê wê boriyên petrolê yên li herêmê jî hedef bigire.

Cebarî tekez kir ku heta ku zext li ser hêmanên dijmin neyê kirin, destûr nayê dayîn ku petrol ji herêmê were hinardekirin û behsa pêdiviyên enerjiyê yên Amerîkayê kir û got, "Ew tî ne ji bo petrola herêmê, lê dilopek jî nagirin."