JPMorgan: Heke Hurmizê normal nebe dê bihayê petrolê rabe

PeyamaKurd - Banka veberhênanê ya Amerîkî JPMorgan, hişyarî da ku heke barkêşiya li Tengava Hurmizê heta meha tîrmehê normal nebe, dibe ku di bihayê petrolê de zêdebûneke giran pêk were.

Metirsiya 120 Dolarî

Li gorî analîstên bankayê, berdewamiya pirsgirêkên li tengavê dikare 15 heta 20 dolar li bihayê her barîlekê zêde bike. Di vê rewşê de tê payîn ku bihayê petrolê dîsa bigihîje asta 120 dolarî, mîna dema ku şerê li Rojhilata Navîn di lûtkeyê de bû.

Zêdetirî 300 Keştî Mahsûr Mane

Her çend di navbera Amerîka û Îranê de agirbesteke demkî hebe jî, barkêşiya enerjiyê hîn tam nehatiye ser rêça xwe. Li gorî daneyên JPMorgan:

Heta 9ê nîsanê, 346 keştiyên enerjiyê di Kendava Basrayê de asê mane.

Di van keştiyan de 104 milyon barîl petrola xam û mîlyonên ton gaza xwezayî hene.

Çav li Danustandinên Washington û Tehranê ne

Tê payîn ku rayedarên Amerîka û Îranê di dawiya vê hefteyê de careke din bicivin. Heke danustandin erênî derbas nebin û astengiyên li tengavê heta tîrmehê dewam bikin, kêmbûna dabînkirina petrolê dê bibe sedema bihabûneke mezin di bazara cîhanî de.

Heta niha bihayê petrola Brent li dora 100 dolarî tê firotin.