Lîsteya sûîqestê ya Îsraîlê: Ji Xamineyî heta Pizişkiyan hemû serok di armancê de ne

PeyamaKurd – Sibeha îro 28ê Sibatê, di encama êrîşên hevbeş ên Amerîka û Îsraîlê de, derket holê ku stratejiya şer guheriye ber bi "lêdana serî".

Li gorî raporên televîzyona dewletê ya Îsraîlê, lîsteyeke taybet a sûîqestê hatiye amadekirin ku tê de navê Rêberê Bilind Elî Xameneyî, Serokkomar Mesûd Pizişkiyan û endamên Konseya Ewlekariya Neteweyî hene.

Herêma Kolana Pastourê ya Tehranê, ku dilê desthilatdariyê ye, bi giranî hatiye bombebarankirin. Tevî ku Xamineyî bo cihekî ewle hatiye veguhestin, êrîşên li ser ofîsên serokatiyê û Meclîsa Pisporan nîşana biryardariya Washington û Tel Avîvê ne ji bo guhertina rejîmê bi rêya hêzê.

Operasyona ku tê payîn qonaxa wê ya yekem çar rojan bidome, bi hevahengiya tam a Amerîkayê pêk tê. Ji bo piştgirî û parastina vê operasyonê, keştiya balafirhilgir a herî mezin a cîhanê USS Gerald R. Ford gihîştiye beravên Îsraîlê, û USS Abraham Lincoln jî li Deryaya Erebî di rewşa amadebaşiyê de ye. Çavkaniyên ewlehiyê diyar dikin ku ev şer berdewamiya "Şerê Dûwanzdeh Rojan" ê sala 2025an e û armanc ne tenê sînordarkirina nukleerî ye, belê ji holê rakirina temamî ya gefa Îranê ye.

Serokê Amerîkayê Donald Trump, beriya destpêkirina êrîşê, nerazîbûna xwe ya tund li ser helwesta Îranê ya di danûstandinan de nîşan dabû. Trump bi eşkereyî diyar kir ku ew ê tu carî rê nedin "dewlemendkirina ûranyûmê li ser axa Îranê". Ev daxuyaniya tund nîşan dide ku plana "stokkirina sifir" a ku Omanê behsa wê dikir, ji aliyê Washingtonê ve nehatiye qebûlkirin û li şûna dîplomasiyê, "vebijêrka leşkerî" hatiye hilbijartin.

Rayedarên Îranî, tevî ku di bin êrîşeke giran de ne, ragihandin ku ew amadekariya "bersiveke dijwar" dikin. Niha ku mûşekên balîstîk ên Îranê ber bi Îsraîlê ve hatine avêtin, herêm ketiye nava qonaxa herî tarî ya şerê rasterast.