Nêçîrvan Barzanî û Mesrûr Barzanî li ser Enfalê peyam weşandin

PeyamaKurd - Serokê Herêma Kurdistanê Nêçîrvan Barzani û Serokwezîrê Herêma Kurdistanê Mesrûr Barzanî di salvegera 38emîn a Komkujiya Enfalê de peyamek weşandin.

Di peyama xwe de Nêçîrvan Barzanî got, "Ev ne tenê sûcek bû, lê hewldanek bêencam bû ji bo tunekirina bi tevahî ya gelekî aştîxwaz."

Ji aliyê din ve, Mesrûr Barzanî diyar kir ku divê hikûmeta Iraqê berpirsiyariya xwe ya exlaqî û destûrî bi cîh bîne û tezmînatek têrker bide malbat û xizmên şehîd û qurbaniyên Enfalê.

Nêçîrvan Barzanî: Em ê her tiştê ku ji destê me tê bikin

Serokê Herêma Kurdistanê Nêçîrvan Barzanî di salvegera 38emîn a Komkujiya Enfalê de daxuyaniyek nivîskî weşand. Di daxuyaniya xwe de, Barzanî di derbarê Komkujiya Enfalê de, ku di sala 1988an de ji aliyê rejîma Iraqê ve hate destpêkirin û bû sedema mirina zêdetirî 182,000 Kurdan, got, "Em ê di pêvajoya lêgerîna cenazeyên pîroz ên şehîdan û vegerandina wan bo singê welatê xwe de tu hewldanek xwe nedin. Em ê her tiştê ku ji destê me tê bikin da ku bêtir xizmet ji xizmên qurbaniyên Enfalê re peyda bikin."

Nêçîrvan Barzanî herwiha dubare kir ku, li gorî biryara Dadgeha Cezayê Bilind a Iraqê, Hikûmeta Federal a Iraqê berpirsiyar e ji bo dayîna tezmînata madî û manewî ji xizmên qurbaniyan re.

Bi boneya bîranînê, Nêçîrvan Barzanî tekez kir ku "parastina statuya destûrî ya Herêma Kurdistanê û destkeftiyên me tenê bi hevahengî û hewldanên hevbeş ên hemî partî û pêkhateyên siyasî mimkun e."

Peyama Serokwezîr Mesrûr Barzanî wiha ye:

"Kampanyaya Enfalê yek ji êrîşên herî hovane yên paqijkirina etnîkî û qirkirinê bû ku ji aliyê rejîma berê ya Iraqê ve li dijî gelê Kurdistanê hat kirin, ku di encamê de bi hezaran mirovên bêguneh hatin wendakirin û şehîd bûn û bi hezaran gund hatin wêrankirin.

Ev qirkirin û komkujiya ku li dijî gelê Kurdistanê hat kirin divê her tim di bîra me de bimîne. Divê nifşên me bizanin ku destkeftiyên me yên heyî ne bi hêsanî hatin bidestxistin, ne jî ji me re hatin dayîn; ew encama têkoşîn û xwînrijandina bi hezaran şehîdên bi rûmet ên Kurd in.

Di vê bîranînê de, em careke din tekez dikin ku divê hikûmeta Iraqê berpirsiyariya xwe ya exlaqî û destûrî bi cîh bîne û malbat û xizmên şehîd û qurbaniyên Enfalê bi awayekî têrker tezmînat bide.

Di salvegera 38emîn a Enfalê de, em silavê li giyanên pîroz ên şehîdên Enfalê û hemû şehîdên Kurdistanê dikin."