Pentagon ji bo parastina wezîrên xwe ‘mertalê lazerê’ bi cih dike

PeyamaKurd - Wezareta Parastinê ya Dewletên Yekbûyî yên Amerîkayê (Pentagon), ji bo parastina malên du wezîrên herî krîtîk ên kabîneyê, li ser bicihkirina sîstemên lazerî yên dijî-dronan dixebite. Ev biryara awarte piştî dîtina dronên "nenas" li ser asmanê baregeha leşkerî ya li Washington DCyê hat girtin.

Teknolojiya lazerê li Fort McNairê

Li gorî nûçeya rojnameya The New York Timesê, Pentagon plan dike ku sîstema lazerî ya pêşketî li baregeha Fort Lesley J. McNair a li başûrê rojavayê Washington DCyê bi cih bike. Ev baregeh wekî cîhê rûniştina Wezîrê Parastinê Pete Hegseth û Wezîrê Derve Marco Rubio tê bikaranîn. Tê ragihandin ku ev pêngav di çarçoveya rageşiya leşkerî ya bi Îranê re û parastina serkirdeyan de tê nirxandin.

Dronên nenas bûn sedema panîkê

Ev tedbîrên tund piştî wê yekê hatin ku di nava du hefteyan de çendîn dronên nenas û bêdestûr li ser asmanê baregeha McNair hatin dîtin. Li gorî nûçeya Washington Postê, çavkaniya van dronan hîn nehatiye tespîtkirin. Qesra Spî ji bo vê mijarê civîneke lezgîn a ewlehiyê pêk anî û fikarên li ser êrîşên muhtemel ên li dijî rayedarên payebilind gihîştin asta herî bilind.

Gefên li ser bargehên stratejîk 

Pevçûna bi dronan re ne tenê li Washingtonê, lê li seranserê Amerîkayê bûye pirsgirêkeke sereke:

Baregeha Barksdale: Di 9’ê Adarê de, dîtina dronên bêdestûr li ser vê baregeha li Louisianayê, bû sedema karantînaya tam. Ev baregeh ji bo Amerîkayê xwedî giringiyeke jiyanî ye, ji ber ku zêdetirî 40 balafirên bombebaranê yên B-52 yên ku dikarin çekên nukleerî hilgirin, li wir in.

El Paso, Texas: Meha borî ji ber gumanekê asmanê herêmê hat girtin, lê paşê derket holê ku drona gumanbar tenê "baloneke şahiyê" bûye.

Pentagon bi bicihkirina van sîstemên lazerê, dixwaze "mertalekî parastinê" yê teknolojîk li dora navendên desthilatdariya Amerîkayê ava bike da ku rê li ber her cûre sabotaj yan jî êrîşên bi dronan bigire.