Pizişkiyan bi Putin re axivî

PeyamaKurd - Serokê Îranê Mesûd Pizişkiyan di pêwendiyeke telefonî de bi Serokê Rûsyayê Vladimir Putin re tekez kir ku welatê wî amade ye ji bo peymaneke hevseng û dadperwer ku wê aştî û ewlehiya mayînde li herêmê misoger bike.

Li gorî daxuyaniyek ji Serokatiya Îranê, Pizişkiyan bi Serokê Rûsyayê Vladimir Putin re pêwendiyeke telefonî kir.

Pizişkiyan û Putin li ser agirbesta heyî û pêşketina danûstandinên li Îslamabadê axivîn.

Serokê Îranê diyar kir ku astengiya herî mezin a li pêşiya gihîştina peymaneke dadperwer standardên dualî û nêzîkatiya hegemonîk a Dewletên Yekbûyî yên Amerîkayê ye. Wî herwiha tekez kir ku xeta sor a Îranê berjewendiyên wê yên neteweyî ne û got ku heke DYA pabendî çarçoveya hiqûqa navneteweyî be, peymanek wê ne dijwar be.

Pizişkiyan amadebûna welatê xwe ji bo gihîştina peymaneke hevseng û dadperwer ku wê aştî û ewlehiya mayînde li herêmê garantî bike, dubare kir.