Rubio: Di hevdîtinên bi Îranê re de hinek pêşveçûn heye

PeyamaKurd - Wezîrê Derve yê Amerîkayê Marco Rubio û Sekreterê Giştî yê NATOyê Mark Rutte, li bajarê Helsingborg ê Swêdê beriya Civîna Wezîrên Derve yên NATOyê daxuyaniyên girîng dan rojnamevanan. Di daxuyaniyan de mijarên wekî pêvajoya dîplomatîk a bi Îranê re, parastina asayîşa Tengava Hurmuzê û paşeroja hevbendiya NATOyê hatin nirxandin.

Wezîrê Derve Marco Rubio ragihand ku danûstandinên wan ên bi Îranê re ji bo gihîştina peymaneke berfireh berdewam dikin. Rubio got: "Di hevdîtinan de hinek pêşveçûn çêbûye. Ez naxwazim mezin bikim, lê tevgereke piçûk heye û ev tiştekî baş e." Lê belê Rubio tekez kir ku helwesta Amerîkayê ya stratejîk neguheriye û got: "Ev rejîm qet nikare bibe xwediyê çekên nûklerî. Ji bo vê yekê jî divê em rûbirûyî pirsa dewlemendkirina uranyumê ya di asta bilind de bibin."

Krîza "Bacê" ya li Tengava Hurmuzê

Rubio bal kişand ser hewldanên Îranê yên ji bo kontrolkirina Tengava Hurmuzê û diyar kir ku Tehran hewl dide sîstemeke standina "baca derbasbûnê" ava bike û ji bo vê yekê Omana cîran jî qanî bike. Rubio ev pêngav wekî "nayê qebûlkirin" bi nav kir û ragihand ku wan reşnivîsek pêşkêşî Encûmena Ewlehiyê ya Neteweyên Yekbûyî (NY) kiriye: "Heke ev yek li Tengava Hurmuzê were kirin, dê li pênc deverên cuda yên cîhanê jî were dubarekirin. Em hewl didin li NYyê lihevkirinekê çêbikin da ku rê li ber vetoyan bigirin."