Wezîrê Berevaniyê yê DYAyê Hegseth hişyariya dawî da Îranê

PeyamaKurd - Wezîrê Berevaniyê yê Dewletên Yekbûyî yên Amerîkayê Pete Hegseth di serdana xwe ya bajarê Oshkosh ê eyaleta Wisconsinê de bersiva pirsên rojnamevanan da û hişyariyeke tund da rêveberiya Tehranê.

Hegseth ragihand ku her çend fişara aborî li ser Îranê zêde bûbe jî, vebijêrka destwerdan û êrîşên leşkerî heta hewce bike li ser masê dimîne û got: "Heke Îran ew qas bêaqil be ku bi artêşa DYAyê re rûbirû bibe, em ê tişta ku pêwîst e bikin."

Hegseth di daxuyaniya xwe de bal kişand ser rewşa stratejîk a Tengava Hurmuzê û tekez kir ku kontrola sereke ya rêya deryayî di destê DYAyê de ye.

Wezîrê Amerîkî da zanîn ku ew ji bo êrîşên nû yên li derdora Îranê an Tengava Hurmuzê derî nagirin û heke hewce bike dê operasyonên leşkerî ji nû ve dest pê bikin.

Ev daxuyaniya Pentagonê piştî nirxandinên Serokê DYAyê Donald Trump ên li ser serweriya hêzên Amerîkî di deryayan de hat.