Wezîrê Îtalî: Vekişîn nayê wateya qutbûna peywendiyan

PeyamaKurd - Wezîrê Ragiriyê yê Îtalyayê Guido Crosetto ragihand ku bi vegera leşkerên dawî yên ku ji bo veguhestina alavên lojîstîkî li wir bûn, hebûna hêzên wan ên çekdar li Îraqê îro bi dawî dibe.

Crosetto da xuyakirin ku li gorî lihevkirina bi rayedarên Bexdayê re, hemû hêzên hevpeyman û yên Îtalyayê di dema diyarkirî ya 30ê Îlonê de ji axa Îraqê derdikevin.

Crosetto da zanîn ku piştî 12 salên têkoşîna li dijî DAIŞê û perwerdekirina hêzên Îraqî û herêma Kurdistanê, ev pêngav ne ji ber biryareke yekalî ye, lê ji ber derbasbûna qonaxeke nû ye ku ewlehî bi tevahî dikeve ser milê hêzên Îraqî.

Her wiha hate diyarkirin ku Îtalyayê her çend leşkerên xwe vekişandine jî, ew dixwazin têkiliyên xwe yên dualî di warê perwerde û parvekirina tecrûbeyan de xurtir bikin, digel ku tenê du yekîneyên Îtalyayî di çarçoveya mîsyona Yekîtiya Ewropî ya EUAM Iraqê de li herêmê dimînin.