Xamineyî xwepêşandar bi sîxuriyê tawanbar kirin

PeyamaKurd – Li Rojhilatê Kurdistanê û Îranê piştî zêdebûna xwepêşandanên li dijî enflasyon û giranbûna jiyanê, rejîmê gihîştina înternetê li her derê bi piranî qut kir. Ev biryar bû sedem ku peywendiyên bi cîhana derve re bên birrîn, geştên hewayî werin betalkirin û ragihandin hema bêje bi tevahî raweste.

Di heman demê de, Rêberê Bilind Elî Xameneyî xwepêşander bi tawanên giran mîna "ajantiya hêzên biyanî" û tevgerîna li ser navê Donald Trump tawanbar kirin û diyar kir ku ew ê êrîşên li ser avahiyên giştî tehemûl nekin.

Xwepêşandanên ku li gelek bajarên Rojhilatê Kurdistanê û deverên din belav bûne, wekî mezintirîn pêla nerazîbûnê ya sê salên dawî têne nirxandin. Rêxistinên mafên mirovan belge dikin ku di encama pevçûnan de bi dehan kes hatine qetilkirin û televîzyona dewletê jî dîmenên şewitandina otobus, bank û stasyonên metroyê nîşan dide.

Rayedarên rejîma Îranê van bûyeran dixin stuyê Rêxistina Mucahidînên Gel (PMO), lê li aliyê din opozîsyona li derveyî welat banga berfirehkirina çalakiyan dike.

Tevî ku krîza aborî û daketina nirxa rîalê hêrsa gel zêde kiriye, zextên navneteweyî û dorpêçên nukleerî jî rewşa hikûmeta Tehranê dijwartir dikin. Her çend rayedar daxwazên aborî yên xelkê wekî "meşrû" bi nav dikin jî, lê amadekariya bersivên tund li dijî xwepêşanderan dikin. Di vê navberê de, bêdengiya Donald Trump a derbarê piştgiriyeke eşkere ji bo opozîsyonê û qutbûna înternetê, pêşeroja van xwepêşandanên li Îranê di nava nezelaliyekê de dihêle.