Baregeha Barzanî sersaxî li malbata Mamlê kir

PeyamaKurd - Baregeha Barzanî bi helkefta koça dawî ya Hunermendê Kurd ê naskirî Cafer Mamlê di temenê xwe yê 79 saliyê de li bajarê Mehabadê, peyameke serxweşiyê belav kir.

Di peyameke sersaxiyê da Baregeha Barzanî ragihandiye û diyar kiriye ku malbata Mamlê xizmeteka berbiçav a hunera kurdî û stranên resen ê kurdî ya milletê me kirine.

Peyama Sersaxiyê ya Baregaha Barzanî wiha ye:

 “Hêjayên malbata hunermend Cafer Seîdê Mamlê bi dilgiranîyeka zêde me koça dawî Caferê Mamlê kurê Seîdê Mamlê û birayê rehmetiyê Mihemed Mamlê bihîst.

Malbata Mamlê xizmeteka berbiçav a hunera kurdî û stranên resen ê kurdî ya milletê me kirine.

Bi vê boneyê serxweşiya xwe arasteyî malbat xizmê malbatê dikin û hewxemên we û hunermendên Kurdistanê ne. Rehma Xwedê lê be û Xwedayê mezin rehmetî bi behişta xwe nazil bike.”

Hêjayî gotinê ye ku hunermend Mamlê sala 1992yan bi hinek hunermendên başûrê Kurdistanê, berhema Firmêskî Şew - Hêsrên Şevê li bajarê Mehabadê tomar kiriye û sala 1995an di salvegera helbestavan Wefayî de helbestên Wefayî bi awaza xwe strandine ku pêşwazîyeke gelek mezin lê hat kirin.

Sala 1999an jî bi vexwendina Komeleya Kultara Kurdî ya Swêdê li çend bajarên Swêd konser dane û herwiha li Başûr û Rojhelatê Kurdistanê jî derketiye pêş hezkarên xwe.