PDK û YNKê kabîneya nû û namzedê serokomariyê gotûbêj kir

PeyamaKurd- Şandên danûstankar ên Partiya Demokrat a Kurdistanê (PDK) û Yekîtiya Niştimanî ya Kurdistanê (YNK) îro 8ê Çileyê ji bo gotûbêjkirina çend mijarên girîng civiyan.

Di civînê de ji PDKê Hoşyar Zêbarî, Piştîwan Sadiq, Dilşad Şehab û Umêd Sebah û ji YNKê jî Qubad Talebanî, Derbaz Kosret Resûl, Dr. Rêwas Fayîq û Şalaw Şêx Selah amadehî kirin.

Hate ragihandin ku her du şandan pêkanîna kabîneya nû ya Hikûmeta Herêma Kurdistanê, aktîfkirina parlamenê û mijara Serokomariya Iraqê gotûbêj kirine.

Hat diyarkirin ku yek ji senaryoyan ew e ku PDK û YNK hewl didin bibe xwedî namzedekî hevbeş ji bo posta Serokomarê Iraqê bin; çi namzedê PDKê be yan jî yê YNKê be. Ji ber vê yekê, li ser vê mijarê gotûbêjên kûr hatin kirin.

Eger PDK û YNK li ser mijara pêkanîna kabîneya dehem a Hikûmeta Herêma Kurdistanê bigihîjin rêkeftinê, ev yek dê bibe dergehek ji bo aktîfkirina parlamentoyê û yekalîkirina posta Serokomariya Iraqê.

Beriya niha endamên şandên danûstankar ên her du aliyan dabûn xuyakirin ku dibe ku îro bigihîjin rêkeftinê û wextekî ji bo pêkanîna kabîneya nû ya hikûmetê diyar bikin.

Proseya aktîfkirina Parlamentoya Kurdistanê wiha ye:

- Aktîfkirina parlamentoyê û hilbijartina Serokê Parlamenê û cîgirên wî.

- Piştî vê, 5 roj derî ji bo namzedên Serokatiya Herêmê tê vekirin.

- 3 roj wext ji bo îtirazan tê diyarkirin.

- Di nav 15 rojan de Serokê Herêmê tê hilbijartin.

- Piştî hilbijartinê, Serokê Herêmê Serokwezîr radisipêre ji bo pêkanîna kabîneya nû.