Arî Hersîn: PDK û YNK ji bo danûstandinan amade ne

PeyamaKurd - Serokê şaxê Silêmaniyê yê Partiya Demokrat a Kurdistanê (PDK) Arî Hersîn diyar kir ku PDK û Yekîtiya Niştimaniya Kurdistanê (YNK) amade ne ku li ser avakirina Hikûmeta Herêma Kurdistanê nîqaş bikin.

Hersîn ku bi boneya 51emîn salvegera damezrandina YNKê serdana baregeha sereke ya YNKê kir, derbarê têkiliya di navbera PDK û YNKê de got, "Ger têkiliya di navbera PDK û YNKê de normal nebûya, em îro li vir nedibûn."

Rayedarê PDKê diyar kir ku her du tîmên danûstandinê amade ne ku li ser maseya danûstandinê rûnin da ku li ser avakirina Hikûmeta Herêma Kurdistanê nîqaş bikin.

Arî Hersîn herwiha got, "YNK û PDK amûrên xizmeta milet in. Ji ber vê yekê, divê erkên xwe bi cîh bînin û neyên parçekirin."

Di peyamekê de ku doh (Yekşem, 31ê Gulana 2026an) bi boneya 51emîn salvegera damezrandina YNKê hat weşandin, Polîtburoya PDKê girîngiya hevrêziya di navbera hêzên siyasî de ji bo parastina statuya Herêma Kurdistanê tekez kir.