Dîyarbekir seferber bûye: Narîn a 8 salî 3 roj in nayê dîtin

PeyamaKurd – Keçika 8 salî ya bi navê Narîn Guran ku ji paşnîvroya roja Çarşemê ve winda bûye, tevî hemû xebatên tîmên lêgerîn û rizgarkirinê jî hîn nehatiye dîtin.

Li gorî zanyariyên malbatê dane, Narîn Guran piştî ku diçe Kursa Qûranê venagere mala xwe û malbat ji bo dîtina wê hemû aliyên pêwendîdar agahdar dike.

Piştî agahdarkirinê jî xebatên lêgerînê ji aliyê tîmên Rêveberiya Rewşên Lezgîn û Karesatan (AFAD), Şaredarîya Bajarê Mezin a Diyarbekirê û tenduristiya bajêr ve dest pê kirine ku hîn jî ji bilî dîtina şimika Narînê bi qasî 3 kîlometran nêzî mala wê, ti agahî jê nîne.

Dê û bavê Narînê ku li gundekî navçeya Rezan a Diyarbekirê dimînin, bangewaziyê dikin ku keça wan bê dîtin. Heta niha li ser sedema windabûna Narînê ti agahiyeke zelal bidest neketiye.