Apameha ji Tehranê di pêsbirka Miss Almanyayê de bi ser ket

PeyamaKurd – Mîmara Îranî ya 39 salî Apameh Schönauer, di pêşbirka "Miss Almanya" ya ku li Almanyayê hat lidarxistin de bi ser ket.

Apameh Schönauer ku li Tehrana paytexta Îranê ji dayik bûye û di şeş saliya xwe de bi malbata xwe re çûye Almanyayê, diyar kir ku ew xwe wek nimûne dibîne û hêvî dike ku jinên ciwan teşwîq bike.

Schönauer got, li Îranê jinên bi hêz û wêrek hene ku her roj bi daketina kolanan, bi beşdarbûna xwenîşandanan û bilindkirina dengên xwe yên ji bo azadiya xwe canê xwe dixin xeterê û wiha got: "Erka min ew e ku ez jinên ciwan teşwîq bikim, bi taybetî, ku bibin guhertoya herî baş a xwe, mezin û wêrek bifikirin û li vir bigihîjin xeyalên xwe."

Schönauer di axaftina xwe ya li merasîma pêşbirkê de diyar kir ku ew û xwişka xwe "ji bo ku karibin azad bijîn" koçî Almanyayê kirin û got, "Ev rê qet ne hêsan bû."

Schönauer, dayika du zarokan ku bi hembêzkirina hevjînê xwe Timo Schönauer li ser dikê cihê xwe yê yekem pîroz kir, beriya fînalê pêşbirkê di daxuyaniyekê de ji ajansa nûçeyan a Almanî dpa re got, "Ez difikirim ku divê Almanya hinekî din destên xwe veke. Bihêle em bêtir rengîn bin." Schönauer, bang li jinên bi eslê xwe koçber jî kir ku entegre bibin û got, "Min her tim hem Noel hem jî Newroz pîroz kir."

Serketiya pêşbirka "Miss Almanya", "Xelata Seroka Jin" û herwiha 25 hezar Euro xelata pere sitend.

Di peyama xwe ya vîdyoyê ya derbarê Miss Almanya de, Wezîra Malbatê Lisa Paus diyar kir ku "wê ev guhertina mezin di pêşbaziyê de bir baş dît." Paus diyar kir ku pêşbirk êdî bûye bûyerek "li ser mirovan û ne nêrîna yekalî ya jinan."