Dezgeha Xêrxwazî ya Barzanî alîkarî gihand 1500 malbatên Helebê

PeyamaKurd - Dezgeha Xêrxwazî ya Barzanî (BCF), di çarçoveya xebatên xwe yên mirovî de, alîkariyên xwarin û tenduristiyê gihand 1500 malbatên koçber ên ku ji taxên Şêx Meqsûd û Eşrefiyê yên Helebê neçar mane ber bi Efrînê ve biçin.

BCFê ragihand, tîmên wan li herêma Efrîn û gundewarên wê, ji bo sivîlkirina êşa koçberên Helebê di nava tevgerekê de ne. Di vê çarçoveyê de, 1500 selikên xwarinê li ser malbatên koçber hatin belavkirin. 

Hate diyarkirin ku ji bo 1000 kesî xwarina germ hatiye dabînkirin û li ser 1000 malbatên din jî pêwîstiyên cuda yên xwarinê hatine parvekirin.

Ji bilî alîkariyên xwarinê, hat eşkere kirin ku klînîkên gerok ên BCFê ligel tîmeke bijîşkî ku ji 5 pisporan pêk tê, li gund û kampan digerin. Ev tîm ji bo dermankirina nexweşan û dabînkirina dermanên pêwîst bi şev û roj di xebatê de ne.

Herwiha hate diyarkirin ku yek ji xalên herî girîng ên xebata tîmên BCFê, başkirina rewşa derûnî ya zarokên koçber e û zarokên ku ji ber şer û koçberiya neçar rastî şokên mezin hatine, bi rêya pisporên tenduristiyê û çalakiyên cuda piştgirî bo wan tê dayîn da ku bandora neyînî ya şer li ser wan kêm bibe.