Heleb: Hêzên Asayîşê ji Şêx Meqsûd û Eşrefiyê vedikişin

PeyamaKurd – Piştî geşedanên dawî û operasyonên artêşa Sûriyeyê li navenda bajêr, lihevkirineke nû di navbera aliyan de pêk hat. Li gorî agahiyên ku Parêzgariya Helebê ragihandine, hêzên Asayîşê yên li taxên Şêx Meqsûd û Eşrefiyê dest bi amadekariyên vekişînê kirine.

Li gorî nexşerêya lihevkirinê, hêzên ewlehiyê yên Kurdî dê ji taxên xwe yên niha li Helebê derkevin û ber bi herêmên Rêveberiya Xweser ên li rojhilatê Çemê Firatê ve werin veguhastin. Hat diyarkirin ku ev veguhestin di bin çavdêriya ewlehiyê de û bi otobusan pêk tê.

Hate ragihandin ku hêzên Asayîşê tenê bi "çekên şexsî yên sivik" derbasî aliyê din ê Firatê dibin. Ji bo vê armancê, di saetên sibehê de gelek otobus li xaçerêya Leramûnê hatin komkirin da ku endamên asayîşê û çekdarên li herêmê veguhêzin.

Hevdem ligel vekişînê, saziyên dewletê yên Sûriyeyê amadekariyên xwe temam kirine ku bikevin nav taxên Şêx Meqsûd û Eşrefiyê. Tê payîn ku piştî temambûna vekişînê, hemû saziyên sivîl û ewlehiyê yên hikûmetê li van taxan dest bi karên xwe bikin û kontrolê bi temamî werbigirin.