HSD: Ji ber êrîsên Tirkiyê cotkar ji xebatên çandiniyê bêpar hatine histin

PeyamaKurd – HSDê bi daxuyaniyekê diyar kir, dewleta Tirk êrîşên xwe li dijî Til Temir, Eyn Îsa û Girê Spî didomîne û cotkar ji xebatên wan ên çandiniyê bêpar hiştine.

Navenda Ragihandinê ya Hêzên Sûriya Demokratîk – HSDê têkildarî êrîşan da zanîn: “Cotkarên gundê Um Beramîl, Mielek, Dibis ên Eyn Îsa û yên Til Temir û Zirganê ku zeviyên wan nêzî eniyên şer in, ji ber êrîşên dewleta Tirk neçar mane xebatên xwe rawestînin.”

HSDê eşkere kir: “Artêşa Tirk êrîşî gundên Selîbî, depoyên Qizelî û Muxtariyê yên rojavayê Girê Spî kir û cotkarên li herêmê bi êrîşên sekvanî kirin armanc.

Herwiha destnîşan kir, ev êrîşên li kêleka xerakirina xwezaya herêmê, dibe pirsgirêk di peydakirina xwarinê de û bandorê li debara jiyanê dike.

HSDê diyar kir, artêşa Tirkiyê bi van êrîşan peymana agirbestê binpê dike û nahêle şêniyên herêmê qûtên xwe yên rojane dabîn bike.