Li nêzîkî sînorê navçeya Koyê ya li Hewlêrê dronek hat xistin

PeyamaKurd - Hat ragihandin ku wesayîteke hewayî ya bêmirov (dron) berî ku bigihîje armanca xwe li nêzîkî sînorê navçeya Koyê ya li Hewlêrê hat xistin.

Îdiayên êrîşa bi droneyan a li ser navçeya Şeqlawe ji aliyê rayedarên herêmî ve hatin redkirin.

Endamê Lijneya Rêveber a Partiya Demokrat a Kurdistana Îranê (PDK-I) û serokê Fermandariya Navendî ya Pêşmerge Kawa Bahramî ji Rudawê re got ku dron li dora saet 1:30ê sibê hatiye teqandin û li deşta Koyê, dûrî deverên niştecihbûnê, ketiye.

Berpirsekî din ê PDK-I Hema Nazîf Kadrî diyar kir ku şeva borî û îro sibê tu êrîş an bombebaran li ser herêma wan çênebûne.

Di vê navberê de, îdiayên êrîşa bi droneyan a li ser navçeya Şeqlawe ya li Hewlêrê derketine holê. Waliyê Navçeya Şeqlawe Suwara Ekrem, di daxuyaniyekê de ji Rudawê re îdia red kirin û got, "Li ser herêma me tu êrîş bi dronan çênebûne."

Tevî agirbesta di navbera DYA, Îsraîl û Îranê de, herêma sînor a Koyê û bi taybetî Kampa Azadî ku malbatên Pêşmergeyên PDK-I lê dijîn, berê jî rastî êrîşên dronan hatiye.

Herî dawî, hate ragihandin ku roja pêncşemê ya borî pênc dronan êrîşî kampê û derdora wê kirine.