Mesrûr Barzanî pêşwazî li balyozê nû yê Vatîkanê kir

PeyamaKurd - Serokwezîrê Herêma Kurdistanê Mesrûr Barzanî, îro pêşwazî li Balyozê nû yê Vatîkanê yê li Iraqê Miroslaw Wachowski kir. Di hevdîtinê de, Balyozê nû silav û spasiyên Qedaseta Papa gihandin Serokwezîr Mesrûr Barzanî û bal kişand ser rola girîng a Herêma Kurdistanê di parastina mafên hrîstiyanan û geşepêdana çanda pêkvejiyanê de. Wachowski destnîşan kir ku Kurdistan di dilê Qedaseta Papa de xwedî cihekî taybet e û ew her dem ji bo aştî û xêra gelê Kurdistanê dua dike.

Hevkariya di navbera Hewlêr û Vatîkanê de

Serokwezîr Mesrûr Barzanî pîrozbahî li balyozê nû kir û hemû piştevaniya Hikûmeta Herêma Kurdistanê ji bo serkeftina erkê wî nîşan da. Her du aliyan li ser çaksaziyên hikûmetê û pêvajoya pêkanîna kabîneya nû ya hikûmeta federal a Iraqê gotûbêj kirin. Ev serdan di demekê de pêk tê ku Herêma Kurdistanê wekî stargeheke aram ji bo hemû pêkhateyên olî û neteweyî yên li herêmê tê nasîn û Vatîkan girîngiyeke mezin dide berdewamiya vê aramiya civakî.